ৰিয়া চক্ৰৱৰ্তীৰ জামিন আবেদন নাকচ; সহজেই জেইলৰ পৰা মুক্তি পোৱাৰ সম্ভাৱনা ক্ষীণ
সুশান্ত সিং ৰাজপুতৰ মৃত্যুৰ মাদক দ্ৰব্য কাণ্ড গোচৰত অভিযুক্ত ৰিয়া চক্ৰৱৰ্তীৰ জামিন আবেদনৰ বৃহস্পতিবাৰে মুম্বাইৰ এখন বিশেষ আদালতত শুনানি আছিল।
কিন্তু কালি সেই ৰায়দান স্থগিত ৰাখি শুকুৰবাৰে চূড়ান্ত ৰায় দিয়াৰ কথা ঘোষণা কৰিছিল আৰু আজি নিৰ্দ্ধাৰিত সময়তেই পুৱা গোচৰৰ শুনানি অনুষ্ঠিত হয়।
আদালতে ৰিয়া চক্ৰৱৰ্তী আৰু তেওঁৰ ভাতৃ সৌভিক চক্ৰৱৰ্তীৰ জামিনৰ আবেদন নাকচ কৰে।
এতিয়া অভিনেত্ৰী ৰিয়া আৰু কিছুদিন বাইকুলা জেইলত কটাবলগীয়াটো নিশ্চিত হৈ পৰিল।
সুশান্তৰ মৃত্যুৰ তদন্ত চলোৱা নাৰক’টিকছ কন্ট্ৰ’ল ব্যুৰোই মাদক দ্ৰব্যৰ চক্ৰৰ সৈতে জড়িত থকাৰ অভিযোগত মঙলবাৰে সন্ধিয়া ৰিয়া চক্ৰৱৰ্তীক গ্ৰেপ্তাৰ কৰিছিল।
শুনানিৰ পাছত বিশেষ আদালতখনে জানিবলৈ দিয়ে যে ৰিয়া, সৌভিকৰ উপৰি এই চক্ৰৰ সৈতে জড়িত থকা আন তিনিজন ব্যক্তি দীপেশ সাৱান্ট, আব্দুল বাছিত পাৰিহাৰ আৰু জাইদা ভিলাত্ৰাৰ জামিনো নাকচ কৰা হৈছে।
আনহাতে, এই জামিন নাকচ হোৱাৰ পাছত ৰিয়া আৰু সৌভিকৰ অধিবক্তা সতীশ মানেসিন্ধেই মুম্বাই হাইকোৰ্টৰ দ্বাৰস্থ হোৱাৰ কথা ঘোষণা কৰে।
অৱশ্যে, বাকী চাৰিজনৰ অধিবক্তাইয়ো হাইকোৰ্টৰ দ্বাৰস্থ হোৱাৰ কথা ব্যক্ত কৰিছে।