নেশ্যনেল ইনভেষ্টিগেশ্যন এজেন্সি (NIA)য়ে অসম আৰক্ষীৰ উপ-পৰিদৰ্শক ভাস্কৰ কলিতাক হত্যাৰ অভিযোগত সাতজন আলফা সদস্যৰ বিৰুদ্ধে চাৰ্জশ্বীট দাখিল কৰিছে।
যোৱা ২০১৮ৰ মে’ৰ ৪তাৰিখে বৰডুমচা আৰক্ষী থানাত ভাৰপ্ৰাপ্ত বিষয়া ভাস্কৰ কলিতা অসম-অৰুণাচল সীমান্তত আলফা (স্বা)ৰ এটা দলৰ সৈতে হোৱা এক সংঘর্ষত নিহত হৈছিল।
আলফা সদস্য বিজিত গগৈ, কান্ত বৰা, সন্তোষ গগৈ, যুচিন্ত মৰান, বুবুল মৰান, দীপাংকৰ বৰা আৰু মামুন দিহিঙিয়াৰ বিৰুদ্ধে চাৰ্জশ্বীট দাখিল কৰা হৈছে।
ভাস্কৰ কলিতাই সেইদিনা কুজুপথাৰ গাঁৱৰ এটা ঘৰত আলফা সদস্যৰ এটা দলৰ উপস্থিতিৰ বিশেষ তথ্য লাভ কৰিছিল।
ইয়াৰ পাছতে আৰক্ষী আৰু অৰ্দ্ধ সামৰিক বাহিনীয়ে এক যৌথ অভিযান চলায়।
ঘৰটোৰ চৌহদত প্ৰৱেশ কৰিবলৈ লোৱাৰ সময়ত ঘৰৰ ভিতৰত আত্মগোপন কৰি থকা আলফা সদস্যসকলে তালাচী চলাবলৈ যোৱা দলটোলৈ অপ্ৰৰোচিতভাৱে গুলীচালনা কৰাত ভাস্কৰ কলিতা নিহত হয়।
আনহাতে, কম পোহৰৰ সুযোগ লৈ আলফা বিদ্ৰোহীসকল ওচৰৰ অৰণ্যলৈ পলাই যাবলৈ সক্ষম হয়।
পলাই যোৱাৰ সময়ত আলফা সদস্যসকলে মৃত আৰক্ষী বিষয়াগৰাকীৰ পৰা এটা এ কে -৪৭ ৰাইফল লৈ যায়। এন আই এই ইয়াৰ চাৰ্জশ্বীটত এইকথা উল্লেখ কৰিছে।
এন আই য়ে জানিবলৈ দিয়া মতে তদন্তত এই অভিযান আলফা নেতা অৰুনোদই দহোতীয়াৰ নিৰ্দেশত সংঘটিত কৰা বুলি নিশ্চিত হৈছে।
পৰৱৰ্তী তদন্ত চলি থকাৰ কথা জানিবলৈ দি এন আই এ লগতে কয় যে সশস্ত্ৰ আলফাৰ সদস্যসকল ম্যানমাৰৰ এটা শিৱিৰৰ পৰা আহিছিল আৰু আক্ৰমণৰ লগতে পুঁজি সংগ্ৰহৰ পৰিকল্পনা লৈ আহিছিল।
আলফা (স্বা)ৰ সৈতে সংঘৰ্ষত নিহত অসম আৰক্ষীৰ সাহসী বিষয়াগৰাকীয়ে স্বাধীনতা দিৱসত মৰণোত্তৰভাৱে সাহসিকতাৰ বাবে আৰক্ষীৰ পদক লাভ কৰে।