পি পি ই কিট কেলেংকাৰী সন্দৰ্ভত দিল্লীৰ উপ-মুখ্যমন্ত্ৰী মণিষ ছিছোদিয়াৰ বিৰুদ্ধে অসমৰ মুখ্যমন্ত্ৰী হিমন্ত বিশ্ব শৰ্মাৰ পত্নী ৰিণিকি ভূঞা শৰ্মাই ৰুজু কৰা মানহানিৰ গোচৰত স্থগিতাদেশ জাৰি কৰিছে আদালতে।
আজি গুৱাহাটী সত্ৰ ন্যায়ালত এই গোচৰৰ প্ৰথমটো শুনানি গ্রহণ কৰি আদালতে স্থগিতাদেশ জাৰি কৰাৰ লগতে পৰৱৰ্তী শুনানিৰ তাৰিখ ৩ ছেপ্টেম্বৰত নিৰ্ধাৰণ কৰে।
আম আদমি পাৰ্টীৰ ৰাজ্যিক কার্যালয়ত সোমবাৰে অনুষ্ঠিত এক সংবাদ মেলত এই কথা প্ৰকাশ কৰে ‘আপ, অসমৰ’ৰ আইনী কোষৰ সমন্বয়ক আৰু যুটীয়া সমন্বয়ক ক্ৰমে নাৰায়ণ দত্ত ভূঞা আৰু আলাউদ্দিন আহমেদ আৰু দলৰ ৰাজ্যিক যুটীয়া সমন্বয়ক জিতুল ডেকাই।
আজিৰ শুনানি কালত পদকীয়া আৰু গোচৰীয়া দুয়োপক্ষৰ অধিবক্তা উপস্থিত থাকে। দিল্লীৰ উপ-মুখ্যমন্ত্ৰীৰ হৈ আদালতত উপস্থিত থাকে অধিবক্তা ক্রমে অনুপম শ্রীবাস্তব, ঋষিকেশ কুমাৰ নাৰায়ণ দত্ত ভূঞা, আলাউদ্দিন আহমেদ আৰু আৰিফ ছিকদাৰ।
মণিষ ছিছোদিয়াৰ অধিবক্তাই আদালতত আবেদন কৰে যে দিল্লীৰ উপ মুখ্যমন্ত্ৰীগৰাকীয়ে বহুল প্ৰচাৰিত বাতৰিৰ ভিত্তিত ৰিণিকি ভূঞা শৰ্মাৰ নাম সংবাদ মেলত উল্লেখ কৰিছিল। তেওঁৰ বক্তব্যত নিজববীয়াকৈ একো উল্লেখ কৰা নাই। গতিকে ছিছেদিয়াৰ বিৰুদ্ধে ৰিণিকি ভূঞা শৰ্মাই তৰা গোচৰ মহামান্য আদালতে খাৰিজ কৰিব লাগে।
আদালতে দুয়ো পক্ষৰ যুক্তি শুনাৰ পাছত আজিৰ আবেদনৰ চূড়ান্ত সিদ্ধান্ত নোলোৱা পৰ্যন্ত ৰিণিকি ভূঞা শৰ্মাই তৰা গোচৰটোত স্থগিতাদেশ জাৰি কৰে।
