ইণ্টাৰনেচনেল ৰেছকিউ কমিটি নামৰ এটা এমেৰিকান আৰ্থিক আৰু মানৱীয় সাহায্যকাৰী সংস্থাই এই আশংকা প্ৰকাশ কৰিছে।
সংস্থাটোৱে ইয়াৰ প্ৰতিবেদনত আশংকা প্ৰকাশ কৰিছে যে এই সংখ্যা বিশ্বজুৰি আনুমানিক ৫০০ মিলিয়নৰ পৰা এক বিলিয়ন হ’ব।
আৰু সংঘৰ্ষ-আক্ৰান্ত আৰু অস্থিৰ দেশসমূহক সামৰি ৩ মিলিয়নকৈয়ো অধিক লোকৰ এই ৰোগত মৃত্যু হ’ব পাৰে।
সংস্থাটোৰ এই প্ৰতিবেদন বিশ্ব স্বাস্থ্য সংস্থা আৰু লণ্ডনৰ ইম্পিৰিয়েল কলেজৰ তথ্য আৰু মডেলক ভিত্তি কৰি যুগুত কৰা হৈছে।
মহামাৰী ভাইৰাছবিধৰ সংক্ৰমণৰ গতি বিশ্বজুৰি হ্ৰাস কৰাৰ বাবে আৰ্থিক আৰু মানৱীয় সহায়ৰ প্ৰয়োজন বুলি সংস্থাটোৱে মত প্ৰকাশ কৰিছে।
“বলিষ্ঠ সঁহাৰিৰ বাবে অলপ মাত্ৰ সময় আছে।…বিশ্বৰ আটাইতকৈ ভগ্ন আৰু যুদ্ধ-বিধ্বস্থ দেশসমূহত এই মহামাৰীৰ সম্পূৰ্ণ, বিধ্বংসী আৰু অসমানুপাতিক হেঁচা অনুভূত হ’বলৈ এতিয়াও বাকী,” বিবিচিৰ বাতৰিত সংস্থাটোৰ উদ্ধৃতি।
“মানৱীয় সহায়ৰ ক্ষেত্ৰত যিকোনো অন্তৰায় আঁতৰ কৰাৰ বাবে চৰকাৰসমূহে একেলগে কাম কৰিবই লাগিব।”
সংস্থাটোৱে কয় যে আফগানিস্তান আৰু ছিৰিয়াৰ দৰে বিধ্বস্ত দেশত এক বৃহৎ মহামাৰীৰ প্ৰাদুৰ্ভাৱ ঘটাৰ পৰা আঁতৰি থাকিবলৈ জৰুৰী পুঁজিৰ প্ৰয়োজন।
ইউ এছস্থিত সংস্থাটোৱে লগতে কয় যে ঘৰৰ আকাৰ, জনসংখ্যাৰ ঘনত্ব, স্বাস্থ্য ব্যৱস্থাৰ সক্ষমতা আৰু পূৰ্বৰে পৰা সংঘাত আদি সকলো উপাদানে ৰোগবিধৰ গুৰুতৰ প্ৰাদুৰ্ভাৱৰ শংকা বঢ়াই তুলিব।
এমেৰিকাৰ জন্স হপকিনছ ইউনিভাৰ্ছিটিৰ মতে বিশ্বত এতিয়ালৈকে ৩ নিযুত লোকক ক’ভিড-১৯ পজিটিভৰূপে চিনাক্ত কৰা হৈছে আৰু ২ লাখৰ ওপৰ লোক মৃত্যুমুখত পৰিছে।
