সদৌ অসম ছাত্ৰ সন্থা অসমত ক’ভিড-১৯ সংক্ৰমিত ব্যক্তিৰ সংখ্যাবৃদ্ধিত চিন্তিত হৈ পৰিছে।
মহামাৰীবিধত চিকিৎসক আৰু স্বাস্থ্য কৰ্মীও শেহতীয়াকৈ আক্ৰান্ত হোৱাটোতো চিন্তা ব্যক্ত কৰিছে সংগঠনটোৱে।
দেওবাৰে এক বিজ্ঞপ্তিৰ জৰিয়তে আছুৰ উপদেষ্টা ডঃ সমুজ্জ্বল কুমাৰ ভট্টাচাৰ্য্য, সভাপতি দীপাংক নাথ আৰু সাধাৰণ সম্পাদক লুৰিণজ্যোতি গগৈয়ে কয়, “কৰ’নাৰ সংক্ৰমণ প্ৰতিৰোধ কৰিবলৈ কেন্দ্ৰীয় আৰু ৰাজ্য চৰকাৰে ফলপ্ৰসূ সিদ্ধান্ত ল’ব লাগিব। চিকিৎসক, চিকিৎসা কৰ্মী আক্ৰান্ত হোৱাটো চিন্তনীয় বিষয়।”
ইয়াৰোপৰি, জনসাধাৰণকো লকডাউনৰ নিয়ম মানি চলিবলৈ আছুৱে আহ্বান জনাইছে।
“অতি প্ৰয়োজন নহ’লে ঘৰৰ পৰা বাহিৰলৈ নোলাব। সঘনে চাবোনেৰে হাত ধুব লাগে আৰু মাস্ক পিন্ধি বাহিৰলৈ আহিব লাগে,” বিবৃতিত প্ৰকাশ।
