দেশজুৰি নাগৰিকসকলে ক’ভিড১৯ প্ৰতিষেধক বিনামূলীয়াকৈ পোৱা উচিত, দিল্লীৰ মুখ্য মন্ত্ৰী অৰৱিন্দ কেজৰিৱালে শনিবাৰে এই মন্তব্য কৰিছে।
বিহাৰ নিৰ্বাচনৰ ইস্তাহাৰত বিজেপিয়ে ৰাজ্যখনত বিনামূলীয়া ক’ভিড প্ৰতিষেধকৰ প্ৰতিশ্ৰুতি আগবঢ়োৱাৰ দুদিন পিছতে তাৎপৰ্য্যপূৰ্ণভাৱে কেজৰিৱালে এই মন্তব্য কৰিছে।
বিজেপিৰ উক্ত নিৰ্বাচনী প্ৰতিশ্ৰুতিৰ পিছতে ব্যাপক প্ৰতিক্ৰিয়া হৈছিল।
“ই সমগ্ৰ দেশৰে অধিকাৰ। সকলো লোকেই ক’ভিড১৯ৰদ্বাৰা সমস্যাত পৰিছে। সেয়ে প্ৰতিষেধকটো দেশৰ বাবে বিনামূলীয়া হোৱা উচিত,” কেজৰিৱালে কয়।
বিহাৰৰ নিৰ্বাচনত বিজেপিয়ে ক’ভিডৰ বিনামূলীয়া প্ৰতিষেধক ইস্তাহাৰৰ এক নম্বৰ প্ৰতিশ্ৰুতিৰূপে আগবঢ়াইছে।
পিছত অৱশ্যে বিজেপিয়ে স্পষ্ট কৰে যে প্ৰতিষেধকটো সকলো নাগৰিককে দিয়া হ’ব আৰু কয় যে কেন্দ্ৰৰ পৰা সামান্য দামত প্ৰতিষেধকটো পোৱাৰ পিছত তাক বিনামূলীয়াকৈ দিয়া নিদিয়াৰ সিদ্ধান্ত ৰাজ্য চৰকাৰসমূহৰ হ’ব।
কেন্দ্ৰীয় মন্ত্ৰী নিৰ্মলা সীতাৰমনে পাটনাত বৃ্হস্পতিবাৰে বিজেপিৰ ১১ দফীয়া ইস্তাহাৰ মুকলি কৰিছিল।
