ধুবুৰী জিলাত কোভিড আক্ৰান্তৰ সংখ্যাই অতিক্ৰম কৰিলে ১০০ৰ ঘৰ।ধুবুৰী জিলাত কোভিড আক্ৰান্তৰ সংখ্যাই এশ অতিক্ৰম কৰাৰ পৰিপ্ৰেক্ষিতত ৰাজ্য চৰকাৰে শেহতীয়াকৈ জাৰি কৰা নিয়মাৱলী(এছ অ’ পি)ৰ আধাৰত ধুবুৰীৰ জিলা উপায়ুক্ত দেৱ কুমাৰ কলিতাই এক নিৰ্দেশনা জাৰি কৰিছে৷
এই নিৰ্দেশনা অনুসৰি জিলাখনৰ সকলো মাৰ্কেট, ছুপাৰ মাৰ্কেট, সাপ্তাহিক বজাৰ, আদি সকলো বাণিজ্যিক স্থান সন্ধিয়া ৬ বজাত বন্ধ কৰিব লাগিব৷
ৰেস্তোৰা, ধাবাসমূহ ৬বজাৰ পিছত খোলা থাকিব পাৰিব কিন্তু কেৱল পেকেট খাদ্যহে বিক্ৰী কৰিব পাৰিব৷
জিলা প্ৰশাসনৰ কঠোৰ নিৰ্দেশনা মানিহে সাংস্কৃতিক অনুষ্ঠান অনুষ্ঠিত কৰিব পাৰিব৷ যিকোনো সমাগমত মুঠ আসনৰ ৫০ শতাংশ লোকহে উপস্থিত থাকিব পাৰিব৷
বিবাহ আদি ঘৰুৱা অনুষ্ঠানত সৰ্বাধিক এশজন লোকহে উপস্থিত থাকিব পাৰিব৷ সকলো অট’ৰিক্সা,ৰিক্সা, টেক্সি আদিত চালকৰ বাহিৰে দুজন যাত্ৰীহে থাকিব পাৰিব৷
আন্তঃজিলা বাছ আৰু যাত্ৰীবাহী নৌকাবোৰ আসন ক্ষমতাৰ পঞ্চাশ শতাংশ যাত্ৰীৰে চলাব লাগিব৷
মৃতকৰ অন্ত্যেষ্টিক্ৰিয়াত সৰ্বাধিক ২০ জন ব্যক্তিহে উপস্থিত থাকিব পাৰিব৷ প্ৰশাসনীয় আৰু জৰুৰী সেৱাৰ বাহিৰে অন্য কাৰ্যালয়ত ৫০ শতাংশ কৰ্মচাৰীহে উপস্থিত থাকিব লাগিব৷
গৰ্ভৱতী মহিলা আৰু ৫ বছৰ বয়সৰ তলৰ সন্তান থকা মহিলাসকলে ঘৰৰ পৰাই কাম কৰিব পাৰিব৷ কাৰ্যালয়সমূহ সঘনাই ছেনিটাইজ কৰিব লাগিব৷
শিক্ষানুষ্ঠানত ৫০ শতাংশ শিক্ষাৰ্থীৰ উপস্থিতিৰে পাঠদান কৰিব লাগিব৷ কৰ্মস্থলী আৰু ৰাজহুৱা স্থানত মাস্ক পিন্ধা আৰু সামাজিক দূৰত্ব মানি চলা বাধ্যতামূলক৷
ধৰ্মীয় স্থানত প্ৰতি ঘন্টাত সৰ্বাধিক ২০ জন লোকহে উপস্থিত থাকিব পাৰিব৷ আন এক নিৰ্দেশযোগে জিলা উপায়ুক্তই জিলাখনৰ প্ৰাথমিক আৰু নিম্ন প্ৰাথমিক বিদ্যালয়বোৰ বন্ধ কৰাৰ নিৰ্দেশ দিছে৷
উল্লেখ্য যে ধুবুৰীত আজি ১৬জনৰ দেহত কোভিড ধৰা পৰে৷ ফলত যোৱা ২১ মাৰ্চৰ পৰা আজিলৈ ধুবুৰী জিলাত কোভিডত মুঠ ১১৯ গৰাকী লোক আক্ৰান্ত হ’ল৷
ইয়াৰে ৬ জন সুস্থ হৈছে আৰু দুজনৰ মৃত্যু হৈছে৷ বৰ্তমান আক্ৰান্ত হৈ আছে ১১১ জন৷
