ৰাজ্যৰ ক’ভিড চাফাই কৰ্মী সকলক পুনৰ অসম চৰকাৰৰ যিকোনো বিভাগৰ চতুৰ্থ শ্ৰেণীৰ নাইবা ঠিকাভিত্তিক চতুৰ্থ শ্ৰেণীৰ ৬০ বছৰলৈকে সংস্থাপন দিয়াৰ বাবে ৰাজ্যৰ মুখ্যমন্ত্ৰী আৰু স্বাস্থ্যমন্ত্ৰীলৈ স্মাৰক পত্ৰ প্ৰদান কৰিছে বঙাইগাঁও জিলা ক’ভিড ১৯ চাফাই কৰ্মী সন্থাই ৷
উল্লেখ্য যে বিগত ২০২০ চনৰ পৰা সমগ্ৰ বিশ্বৰ লগতে দেশজুৰি মহামাৰী ক’ভিড ১৯ য়ে যি বিভীষিকাৰ সৃষ্টি কৰিছে ।অসমতো ইয়াৰ প্ৰভাৱ অব্যাহত আছে ৷
এই মহামাৰী ক’ভিডৰ প্ৰথম লহৰৰ সময়ছোৱাত অসম চৰকাৰৰ স্বাস্থ্য বিভাগে বিভিন্ন কোৱাৰেণ্টাইন চেণ্টাৰ স্থাপন কৰি চেণ্টাৰসমূহত চাফাই কৰ্মী নিয়োগৰ বাবে বিজ্ঞাপন প্ৰকাশ কৰিছিল ৷
সেই বিজ্ঞাপনৰ ভিত্তিত মৌখিক পৰীক্ষা অনুষ্ঠিত কৰি ৰাজ্যৰ বিভিন্ন জিলাত স্থাপন কৰা কোৱাৰেণ্টাইন চেণ্টাৰ, ক’ভিড কেয়াৰ চেণ্টাৰ , ক’ভিড হাস্পতাল, স্কেনিং চেণ্টাৰ আদিত স্বাস্থ্য বিভাগ, এনএইএম, জিলা উপায়ুক্ত , মহকুমাধিপতি আৰু পৌৰসভাৰ অধ্যক্ষসকলে সেই সমূহ চাফ- চিকুন কৰাৰ বাবে ১,৩২৪ জন যুৱক- যুৱতীক চাফাই কৰ্মী হিচাপে নিযুক্তি দিছিল ৷
সেই দিনাৰ পৰাই চাফাই কৰ্মীসকলে ক’ভিড ১৯ ৰ বিপদকালত নিজৰ জীৱনক তুচ্ছ জ্ঞান কৰি ক’ভিড যুঁজাৰু হিচাপে নিষ্ঠাৰে সেৱা আগবঢ়াইছিল ৷
যি সময়ত ক’ভিড ৰ ভয়ত মানুহ পথলৈ ওলাব ভয় কৰিছিল, তেনে সময়ত তেওঁলোকে পূৰ্বতে যিবোৰ কাম কৰি ঘৰখন চলাইছিল সেই কামসমূহ এৰি আহি একমাত্ৰ চৰকাৰ আৰু অসমৰ জনসাধাৰণক সহায় কৰাৰ লগতে অনাগত ভৱিষ্যতে এটা ভাল কৰ্মসংস্থাপন লাভ কৰাৰ আশাত ক’ভিড যুঁজাৰু হিচাপে জঁপিয়াই পৰিছিল ৷
কিন্তু বৰ্তমান এইসকল যুৱক- যুৱতী কৰ্মহীন হৈ ঘৰখন চলাব নোৱাৰা হৈ পৰাৰ লগতে হতাশাত ভুগিছে ৷
সেয়ে সন্থাৰ জিলা সভাপতি বিপুল সূত্ৰধৰ আৰু সম্পাদক ৰূপেন নাথে বঙাইগাঁও জিলা উপায়ুক্তৰ জৰিয়তে মুখ্যমন্ত্ৰী আৰু স্বাস্থ্যমন্ত্ৰীলৈ পৃথকে পৃথকে স্মাৰক পত্ৰ প্ৰেৰণ কৰি এই ১,৩২৪ জন ক’ভিড যোদ্ধা অৰ্থাৎ ক’ভিড চাফাই কৰ্মী সকলক পুনৰ অসম চৰকাৰৰ যিকোনো বিভাগৰ চতুৰ্থ শ্ৰেণীৰ নাইবা ঠিকাভিত্তিক চতুৰ্থ শ্ৰেণীৰ ৬০ বছৰলৈকে সংস্থান কৰি দি জীয়াই থকাৰ ব্যৱস্থা কৰি দিয়াৰ বাবে অনুৰোধ জনায় ৷
