নিজামুদ্দিন, অসমৰ বাহিৰৰ পৰা অহা লোকলৈ শেষ আহ্বান আৰক্ষীৰ
অসম আৰক্ষীয়ে নিজামুদ্দিন মাৰ্কাজ বা ক’ভিড১৯ সংক্ৰমিত যিকোনো স্থানৰ পৰা শেহতীয়াকৈ ৰাজ্যলৈ অহা লোকসকলক স্বাস্থ্য কেন্দ্ৰলৈ আহিবলৈ শেষ আহ্বান জনাইছে।
এতিয়াও স্বাস্থ্য কেন্দ্ৰলৈ নহাসকলক মঙলবাৰ, পুৱা ৬ বজাৰ ভিতৰত আহি স্বাস্থ্য পৰীক্ষা কৰোৱাবলৈ নহ’লে ১০৪ ডায়েল কৰি সবিশেষ জনাবলৈ আহ্বান জনোৱা হৈছে।
ইয়াৰ পিছতো এই কাম নকৰাসকল, তেওঁলোকক আশ্ৰয় দিয়াসকল বা তেওঁলোকৰ ভ্ৰমণৰ বিষয়ে জনাসকলৰ বিৰুদ্ধে কঠোৰ আইনী ব্যৱস্থা গ্ৰহণ কৰা হ’ব বুলি কোৱা হৈছে।
অসম আৰক্ষীৰ জৰুৰী জাননীত কোৱা হৈছে যে এনে লোকৰ বিৰুদ্ধে ভাৰতীয় দণ্ড বিধি আৰু দুৰ্য্যোগ ব্যৱস্থাপনা আইন, ২০০৫ৰ প্ৰাসংগিক ধাৰাৰ অধীনত কঠোৰ ব্যৱস্থা লোৱা হ’ব।
URGENT ALERT pic.twitter.com/p1krfj6n0x
— Assam Police (@assampolice) April 6, 2020
ইতিমধ্যে অসমৰ স্বাস্থ্য মন্ত্ৰী হিমন্ত বিশ্ব শৰ্মায়ো সংবাদমেলযোগে অনুৰূপ ঘোষণা কৰিছিল।
তেওঁ কয় যে সোমবাৰৰ পিছত ধৰা পৰা বা ওলাই অহা জামাতিসকলৰ বিৰুদ্ধে ৰাজ্য চৰকাৰে গোচৰ ৰুজু কৰিব।
“আজিৰ পাছত যিসকলে ধৰা দিব বা ওলাই আহিব সেইসকলৰ বিৰুদ্ধেও গোচৰ ৰুজু হ’ব যে বাৰেপতি অনুৰোধ জনোৱাৰ পাছতো তেওঁলোক কিয় ওলাই অহা নাছিল?” মন্ত্ৰী শৰ্মাই কয়।
অসমৰ ২৬ গৰাকী ক’ভিড-১৯ আক্ৰান্তৰ ২৫ গৰাকীৰেই নিজামুদ্দিনৰ ঘটনাৰ সৈতে সম্পৰ্ক থকাৰ পিছতো তালৈ যোৱা একাংশ লোকে এতিয়াও স্বাস্থ্য বিভাগৰ কাষ চপা নাই।
নিজামুদ্দিন মাৰ্কাজলৈ যোৱা জামাতিৰ তালিকা অসম চৰকাৰৰ হাতত থকা বুলিও মন্ত্ৰী শৰ্মাই প্ৰকাশ কৰে।
তেওঁ লগতে কয় যে ভাৰত চৰকাৰে ৰাজ্য চৰকাৰক এতিয়ালৈকে জামাতিৰ ৪ খন তালিকা যোগান ধৰিছে।
তেওঁ কয় যে ৰাজ্য চৰকাৰৰ মতে অসমৰ পৰা নিজামুদ্দিনৰ জামাতলৈ যোৱা লোকৰ সংখ্যা ৮৩১ গৰাকী হ’ব লাগে।
তেওঁ লগতে জনাই যে নিজামুদ্দিনৰ পৰা অহা লোকৰ ৬১৭টা নমুনা সংগ্ৰহৰ কথা আছিল আৰু বৰ্তমানলৈকে ৪৯১টা নমুনা সংগ্ৰহ কৰা হৈছে।
১২৮টা নমুনা সংগ্ৰহ কৰিবলৈ বাকী আছে বুলি মন্ত্ৰীগৰাকীয়ে জনায়।
নিজামুদ্দিনৰ জামাতৰ পিছতে দেশজুৰি ক’ভিড-১৯ত আক্ৰান্ত লোকৰ সংখ্যা হঠাতে বৃদ্ধি পায়।
স্বাস্থ্য মন্ত্ৰ্যালয়ৰ তথ্য মতে নিজামুদ্দিনৰ সমাৱেশে দেশৰ ১৭খন ৰাজ্য আৰু কেন্দ্ৰীয় শাসিত অঞ্চলত প্ৰভাৱ পেলাইছে।