যোৱা বছৰ হাৰ্দিক পাণ্ডিয়া আৰু নাটাছা ষ্টেংকভিচে বিচ্ছেদৰ পথত খোজ দিছিল। এইবাৰ ভাৰতীয় দলৰ আন এজন তাৰকাই নিজৰ বৈবাহিক জীৱনৰ অন্ত পেলাব নেকি? তেওঁৰ শেহতীয়া কাৰ্যকলাপে সেই জল্পনা-কল্পনাক ইন্ধন যোগাইছে। যুজবেন্দ্ৰ চাহালৰ কথাই কোৱা হৈছে। তেওঁ পত্নী ধনশ্ৰীৰ সৈতে ছচিয়েল মিডিয়াত থকা সকলো ছবি ডিলিট কৰিছে! ধনশ্ৰীয়ে আকৌ ইনষ্টাগ্ৰামৰ পৰা চাহলক আনফ’ল’ কৰিলে!
যোৱা বছৰৰ পৰাই চাহাল আৰু ধনশ্ৰীৰ মাজত বিবাদৰ চৰ্চা চলিছিল। চাহালে নিজৰ ছ’চিয়েল মিডিয়া একাউণ্টত লিখিছিল, ‘নতুন জীৱন আৰম্ভ হৈছে।’ অৱশ্যে চাহালে তেতিয়া বিবাহ বিচ্ছেদৰ জল্পনা-কল্পনাক উৰুৱাই দিয়ে। কিন্তু এই ঘটনাৰ পিছতে ধনশ্ৰীয়ে নিজৰ নামৰ পৰা স্বামীৰ উপাধিটো আঁতৰাই দিয়ে। তাৰ পিছতে তেওঁলোকৰ সম্পৰ্কত ফাট মেলাৰ চৰ্চা শিৰোনামলৈ আহে।
এইবাৰ নতুনকৈ আৰম্ভ হৈছে বিচ্ছেদৰ চৰ্চ। ভাৰ্চুৱেল জগতখনত চাহাল অতি সক্ৰিয়। প্ৰায়ে পত্নীৰ সৈতে বিভিন্ন মুহূৰ্তৰ ছবি আৰু ভিডিঅ’ শ্বেয়াৰ কৰে। কিন্তু এইবাৰ সেই সকলোবোৰ ছবি ভাৰতীয় স্পিনাৰগৰাকীয়ে আঁতৰাই পেলাইছে!
ইয়াৰ বিপৰীতে ধনশ্ৰীয়ে ইনষ্টাগ্ৰামত চাহালক আনফ’ল’ কৰিছে। অৱশ্যে চাহালৰ সৈতে পোষ্ট কৰা কোনো ছবি এতিয়ালৈকে ডিলিট কৰা নাই। কিন্তু স্বামী-স্ত্ৰীৰ এই কাৰ্যকলাপত বিবাহ বিচ্ছেদৰ জল্পনা-কল্পনা তীব্ৰতৰ হৈ পৰিছে।
ইয়াৰ মাজতে তাৰকা দম্পতীৰ ঘনিষ্ঠ সূত্ৰৰ পৰাই জানিব পৰা গৈছে, উৰাবাতৰি পৰা নহয় সঁচাকৈয়ে হেনো বিবাহ বিচ্ছেদৰ কথা-বাৰ্তা চলিছে। তেওঁ কৈছে, “তেওঁলোকৰ বিবাহ বিচ্ছেদ হ’বই। ঘোষণাটো মাথোঁ সময়ৰ অপেক্ষা। অৱশ্যে বিচ্ছেদৰ সঠিক কাৰণ এতিয়াও জানিব পৰা হোৱা নাই। কিন্তু যিমানদূৰ জনা যায়, দুয়োজনে পৃথকে থকাৰ সিদ্ধান্ত লৈছে।”
২০২০ চনৰ ১১ ডিচেম্বৰত চাহাল আৰু ধনশ্ৰী বিবাহপাশত আবদ্ধ হয়। অভিনেত্ৰী-নৃত্য পৰিচালক ধনশ্ৰীয়ে জনাইছিল, লকডাউনৰ সময়ছোৱাত ক্ৰীড়া সম্পূৰ্ণৰূপে বন্ধ হৈ আছিল। তেতিয়াই চাহালে ছ’চিয়েল মিডিয়াত তেওঁৰ নৃত্যৰ ভিডিঅ’ চাই নৃত্য শিকিবলৈ ইচ্ছা প্ৰকাশ কৰিছিল। ভাৰতীয় স্পিনাৰগৰাকীৰ ‘ডান্স টিচাৰ’ হোৱাৰ পিছতে দুয়ো তাৰকাই প্ৰেমত পৰে। কিন্তু সেই সম্পৰ্ক হয়তো অতি সোনকালে শেষ হ’বলৈ ওলাইছে।
