বৃহস্পতিবাৰে নিশা ৰাজ্যৰ বিভিন্ন প্ৰান্তত হোৱা প্ৰচণ্ড ধুমুহা-বৰষুণত বিস্তৰ ক্ষতিসাধন হোৱা বুলি জানিব পৰা গৈছে।
নিশা ১০ মান বজাত অহা প্ৰচণ্ড ধুমুহাৰ ফলত তামুলপুৰ মহকুমাৰ গুৱাবাৰীৰ বালুখান্দাত গছ ভাঙি ঘৰৰ ওপৰত পৰাত এগৰাকী মহিলাৰ থিতাতে মৃত্যু হয়। মৃত্যু হোৱা মহিলাগৰাকী নাম সন্ধ্যাৰাণী নম শৰ্মা।
মহিলাগৰাকীৰ মৃত্যুৰ লগতে গাঁওখনৰ বহুকেইটা পশুধনৰো (গৰু) মৃত্যু ঘটে।
আনহাতে বৰকাজুলিতো এগৰাকী মহিলা গুৰুতৰ ভাবে আহত হয়। প্ৰচণ্ড ধুমহাজাকৰ ফলত পথৰ ওপৰত গছ-গছনি ভাঙি পৰাৰ লগতে, বিদ্যুতৰ তাঁৰ, খুটা আদি ঠায়ে ঠায়ে ভাঙি পৰা পৰিলক্ষিত হয়।
মহকুমাটোৰ সদৰৰ লগতে নাগ্ৰীজুলি, বাল্টিপাৰ, ভাওৰাগুৰি, খাটৰবাৰী, লাউপাৰা, দোৱামাখা, গুৱাবাৰী, কুমাৰীকাটা, কাউলী আদি অঞ্চলৰ বহুতো পৰিয়ালৰ ঘৰ-বাৰী ভাঙি পেলায়।
লকডাউনৰ সময়ত খাদ্যৰ বাবে হাহাকাৰ কৰি থকা প্ৰতিটো দুখীয়া পৰিয়ালৰ লোক এতিয়া প্ৰকৃতিৰ তাণ্ডৱত অসহায় হৈ পৰা পৰিলক্ষিত হৈছে।
আনহাতে উজনি অসমৰ টীয়কৰো বিভিন্ন অঞ্চলত যোৱা নিশা প্ৰায় বাৰমান বজাত অহা এজাক বিধ্বংসী ধুমুহাই তাণ্ডৱ চলাই বিস্তৰ ক্ষতি সাধন কৰে।
মাজ নিশা হঠাৎ অহা ধুমুহাজাকে টীয়কৰ লাহিঙৰ তৰাজান আৰু কয়লা জংঘল আদি অঞ্চলৰ ঘৰ-দুৱাৰ, গছ-গছনি, বিদ্যুতৰ খুটা, তাঁৰ আদি ভাঙি-চিঙি তচনছ কৰে আৰু প্ৰায় গ্ৰামাঞ্চলটোৰ গৰিষ্ঠ সংখ্যক লোকৰে ক্ষতি সাধন কৰে বুলি জানিব পৰা গৈছে।
স্বাভাৱিকতেই লক-ডাউনৰ মাজতে নিশা হোৱা বৰদৈচিলাৰ তাণ্ডৱত উপায়হীন হৈ পৰা দুখীয়া তথা ক্ষতিগ্ৰস্ত ৰাইজে চৰকাৰৰ পৰা সাহায্য দাবী কৰিছে।
