নগাঁও জিলাৰ ঐতিহ্যমণ্ডিত পুৰণিগুদামত বিগত কেইবাদিনো নিশা পৰ্য্যন্ত সৃষ্টি হ’য় এক উৎসৱমুখৰ পৰিবেশৰ। মঙলবাৰে নিশা পুৰণিগুদামৰ ভবেন্দ্ৰনাথ শইকীয়া ৰাজহুৱা প্ৰেক্ষাগৃহত সমবেত প্ৰায় ডেৰ সহস্ৰাধিক দৰ্শক-অভিভাৱকৰ উপস্থিতিৰে সফল পৰিসমাপ্তি হয় নৃত্যাঞ্জলী নৃত্য কৰ্মশালাৰ অন্তিম তথা চুড়ান্ত অনুষ্ঠানটো।
ছাত্ৰ-ছাত্ৰী সকলৰ চলিত গ্ৰীষ্মকালীন বন্ধৰ প্ৰতি লক্ষ্য ৰাখি পুৰণিগুদামৰ ভীমৰগাঁৱৰ স্থানীয় যুৱশিল্পী তথা নৃত্যাঞ্জলী নৃত্য কৰ্মশালাৰ পৰিচালন সঞ্চালক ইন্দ্ৰজ্যোতি দাসৰ তত্বাৱধানত যোৱা ২জুলাইৰ পৰা ২০জুলাই পৰ্য্যন্ত বৃহত্তৰ নগাঁও জিলাৰ শিশু সকলক অসমীয়া কলা-সংস্কৃতিৰ ক্ষেত্ৰখনত এখোপ আগবাঢ়াই নিয়াৰ প্ৰচেষ্টাৰে অসমীয়াৰ বাপতিসাহোন বিহু নৃত্য, ঢোল বাদন, সত্ৰীয়া আৰু আধুনিক সৃষ্টিশীল নৃত্যৰ ওপৰত বিশেষ প্ৰশিক্ষণ প্ৰদান কৰা হৈছিল।
উল্লেখযোগ্য যে, কৰ্মশালা খনত বিহুনৃত্যৰ প্ৰশিক্ষক হিচাপে তেজপুৰৰ পৰা আমন্ত্ৰণ কৰি অনা হৈছিল সুদক্ষ বিহুৱতী তথা অভিনেত্ৰী মৌনিতা বৰাৰ লগতে ঢোল বাদনৰ প্ৰশিক্ষক হিচাপে আছিল শিৱসাগৰৰ বাস্তৱ শইকীয়া আৰু নগাঁৱৰ শংকৰ দাস। সত্ৰীয়া নৃত্যৰ প্ৰশিক্ষক হিচাপে আছিল নগাঁৱৰে বিনোদ ভূঞা আৰু ৰাজকুমাৰী ভূঞা।
কৰ্মশালাখনত আধুনিক সৃষ্টিশীল নৃত্যৰ প্ৰশিক্ষণ প্ৰদান কৰিছিল নগাঁৱৰ ক্ৰমে মানস জ্যোতি বৰা, প্ৰাৰ্থ প্ৰতিম দাস আৰু স্মৃতিৰেখা কলিতাই। এই আটাইকেইটা বিভাগতে প্ৰশিক্ষণ গ্ৰহণ কৰা প্ৰায় অৰ্ধশতাধিক কণ-কণ শিশু, কিশোৰ-কিশোৰীয়ে মঙ্গলবাৰে আয়োজিত কৰ্মশালা খনৰ সামৰণি অনুষ্ঠানটো বৰ্ণাঢ্য কাৰ্যসূচীৰ ৰূপায়িত কৰে।
ইয়াৰ মাজতে আটাইকেইজন প্ৰশিক্ষককে উদ্যোক্তা সকলৰ তৰফৰ পৰা ৰাজহুৱাকৈ বিশেষভাৱে সম্বৰ্দ্ধনা জ্ঞাপন কৰাৰ লগতে প্ৰশিক্ষক কেইগৰাকীৰ দ্বাৰাও সামৰণি অনুষ্ঠানটিত প্ৰদৰ্শন কৰা বিশেষ-বিশেষ নৃত্যই উপস্থিত সকলোৰে হৃদয় আপ্লুত কৰিবলৈ সক্ষম হয়।
অন্তিম অনুষ্ঠানটো সাফল্যমণ্ডিত কৰি তোলাৰ ক্ষেত্ৰত কৰ্মশালা খনৰ সৈতে ওতঃপ্ৰোতভাৱে জড়িত হৈ পৰা স্থানীয় মন্টু, নিপা, বনশ্ৰী, পল্লৱী, পাৰ্থ, প্ৰিয়ংকাকে আদি কৰি সমূহ সদস্য-সদস্যাকে নৃত্যাঞ্জলীৰ পৰিচালন সঞ্চালক গৰাকীয়ে কৃতজ্ঞতা স্বীকাৰ কৰা দেখা যায়।
লক্ষণীয়ভাবে নৃত্যাঞ্জলীৰ এই মাহজোৰা প্ৰচেষ্টাই উঠি অহা নৱপ্ৰজন্মৰ কণ-কণ শিশু সকলক নিজৰ জাতি, কলা-সংস্কৃতি আৰু পৰম্পৰাৰ বিষয়ে বহুলভাৱে নহ’লেও কিঞ্চিত মাত্ৰ হ’লেও ধাৰণা দিবৰ বাবে সক্ষম হৈছে বুলি বিশ্বাসী উদ্যোক্তা সকলৰ লগতে অনুষ্ঠানটোত উপস্থিত থকা পুৰণিগুদামৰ গণ্য মান্য ব্যক্তি সকলে।
