শিশুৰ দত্তক গ্ৰহণৰ নামত চলে শিশুৰ অবৈধ সৰবৰাহ; ব্যৱস্থা গ্ৰহণৰ দাবীৰে দৰং জিলাৰ উপায়ুক্তক স্মাৰকপত্ৰ

শিশুৰ দত্তক গ্ৰহণৰ (Adoption) নামত দৰং জিলাত চলি আছে শিশুৰ অবৈধ আৰু অনৈতিক সৰবৰাহ।

শিশুৰ অধিকাৰৰ হৈ কাম কৰা ক্ৰিষ্টেল ভিজন নামৰ এটা সংগঠনে আজি এই বিষয়ে অৱগত কৰি জিলাখনৰ উপায়ুক্ত ঘনশ্যাম দাসক এখন স্মাৰকপত্ৰ প্ৰদান কৰে। উপায়ুক্ত দাস জিলা শিশু সুৰক্ষা সমিতিৰো অধ্যক্ষ।

সংগঠনটোৱে দাবী কৰে যে নিঃসন্তান বয়সীয়া দম্পতীৰ বাবে সহায়ক আইন HAMA ( Hindu Adoption and Maintenance Act ), 1956-খনৰ বহুতে অপব্যৱহাৰ কৰি আছে।

গুৰুতৰ বিষয়টোক লৈ উপায়ুক্তজনক তেওঁৰ কাৰ্য্যালয়ত সাক্ষাৎ কৰা সংগঠনটোৰ সচিব মানবেন্দ্ৰ বৰুৱাই উপায়ুক্তজনে উচিত কাৰ্য্যব্যৱস্থা লোৱাৰ আশ্বাস দিয়া বুলি নৰ্থ-ইষ্ট নাওক জনায়।

সংগঠনটোৰ ৮জন প্ৰতিনিধিয়ে ইয়াৰ উপাধ্যক্ষ লুটফুৰ ৰহমানৰ নেতৃত্বত উপায়ুক্তজনক সাক্ষাৎ কৰিছিল।

নৰ্থ-ইষ্ট নাওৰ আগত মানবেন্দ্ৰ বৰুৱাই কয় যে এই কু-কৰ্মত ক্ষমতাশালী ৰাজনৈতিক নেতা, চৰকাৰী বিষয়া, অধিবক্তা আনকি জুভেনাইল জাষ্টিছ এক্টৰ অধীনত গঠিত গোটৰ লোকো মধ্যস্থতাকাৰী হিচাপে থকাটো অস্বীকাৰ কৰিব নোৱাৰি।

সংগঠনটোৱে উপায়ুক্তজনক এই শিশু সৰবৰাহকাৰী চক্ৰৰ পৰা জিলাখনত শিশুৰ অধিকাৰৰ হৈ কাম কৰা অনুষ্ঠান-প্ৰতিষ্ঠান, ব্যক্তিক সুৰক্ষা দিয়াৰো দাবী কৰে।

“আমি জিলাখনত শিশু তুলি লোৱা (দত্তক গ্ৰহণ) শেহতীয়া প্ৰেক্ষাপটৰ বিষয়ে আৰু প্ৰকৃততেই শিশুৰ অধিকাৰৰ বাবে যিসকল লোকে কাম কৰি আছে, তেওঁলোকে সন্মুখীন হোৱা ভাবুকিৰ বিষয়ে আলোচনা কৰো”, বৰুৱাই কয়।

সংগঠনটোৱে কেৱল জুভেনাইল জাষ্টিষ্ট এক্টৰ অধীনতহে বৈধ দত্তক গ্ৰহণৰ জৰিয়তে শিশুৰ অধিকাৰ নিশ্চিত কৰিবলৈ আহ্বান জনায়।

বৰুয়াই কয়, একাংশ লোকে নিজৰ স্বাৰ্থত প্ৰাইভেট এডপশ্যনক উৎসাহিত কৰি আহিছে, যিটোৱে অবৈধ শিশু সৰবৰাহৰ বাট মুকলি কৰিছে।

“আমাৰ আৱেদন উপায়ুক্তই ধৈৰ্য্যৰে শুনিছে আৰু জিলাখনত এই ক্ষেত্ৰত সম্ভাব্য পদক্ষেপ ল’ব বুলি আশ্বাস দিছে”, ক্ৰিষ্টেল ভিজনৰ উপাধ্যক্ষ লুটফুৰ ৰহমানে কয়।