আগন্তুক বিধানসভা নিৰ্বাচনৰ দিন ঘোষণা কৰাৰ পাছতে পশ্চিম বংগৰ মুখ্যমন্ত্ৰী মমতা বেনাৰ্জীয়ে অসন্তুষ্টি প্ৰদান কৰিছে।
উল্লেখযোগ্য যে শুকুৰবাৰে নিৰ্বাচনী আয়োগে ঘোষণা কৰামতে, ৮টা পৰ্যায়ত ৰাজ্যখনত বিধানসভা নিৰ্বাচনৰ ভোটদান অনুষ্ঠিত হ’ব।
মুখ্যমন্ত্ৰীগৰাকীয়ে ভোটদানৰ এই দীঘলীয়া পক্ৰিয়াটোক লৈ প্ৰশ্ন তুলি সন্দেহ প্ৰকাশ কৰে যে নিৰ্বাচনৰ তাৰিখসমূহ ধাৰ্য কৰাত প্ৰধানমন্ত্ৰী নৰেন্দ্ৰ মোডী আৰু কেন্দ্ৰীয় গৃহমন্ত্ৰী অমিত শ্বাহৰ প্ৰভাৱ আছে, যাতে ৰাজ্যখনত ভাৰতীয় জনতা পাৰ্টিৰ নিৰ্বাচনী প্ৰচাৰ ভালদৰে চলাই যাব পাৰে।
শুকুৰবাৰে কালীঘাটৰ নিজা বাসভৱনত এখনি সংবাদমেল সম্বোধি তেওঁ কয় যে নিৰ্বাচনী আয়োগে ‘‘গেৰুৱা শিবিৰৰ দৃষ্টিভংগীৰে’’ ৰাজ্যখনৰ নিৰ্বাচনক লক্ষ্য কৰা অনুচিত।
‘‘নিৰ্বাচনী আয়োগলৈ সন্মানসহকাৰে ক’ব বিচাৰো যে আন ৰাজ্যসমূহত যিহেতু এটা পৰ্যায়ত ভোটদানৰ ঘোষণা কৰিছে, সেয়ে প্ৰশ্ন উঠিছে যে বংগত কিয় কেইবাটাও পৰ্যায়ত নিৰ্বাচনৰ দিন অনুষ্ঠিত কৰা হৈছে। যদি নিৰ্বাচনী আয়োগে জনসাধাৰণক ন্যায় প্ৰদান কৰে, তেনেহ’লে জনসাধাৰণ ক’লৈ যাব?’’ মুখ্যমন্ত্ৰীগৰাকীয়ে কয়।
‘‘মোৰ হাতত তথ্য আছে যে ভোটদানৰ তাৰিখসমূহ বিজেপিয়ে বিচৰাধৰণে ধাৰ্য কৰা হৈছে। প্ৰধানমন্ত্ৰী নৰেন্দ্ৰ মোদী আৰু গৃহমন্ত্ৰী অমিত শ্বাহৰ পৰামৰ্শমতে এই তাৰিখসমূহ ঘোষণা কৰা হৈছে নেকি? ৰাজ্যৰ নিৰ্বাচনৰ বাবে প্ৰধানমন্ত্ৰী আৰু গৃহমন্ত্ৰীয়ে নিজৰ ক্ষমতাৰ অপব্যৱহাৰ কৰা অনুচিত।’’ মুখ্যমন্ত্ৰীগৰাকীয়ে এইদৰে কয়।
অৱশ্যে এই সকলো কৌশল সত্বেও তেওঁ নিৰ্বাচনত বিজয়ী হ’ব বুলি কয়।
নিজকে বংগৰ কন্যা হিচাপে অভিহিত কৰি মুখ্যমন্ত্ৰীগৰাকীয়ে কয় যে বিজেপিতকৈ তেওঁ বংগক বেছি বুজি পায়, সেয়ে অনাগত নিৰ্বাচনত তেওঁৰ দল তৃণমূল কংগ্ৰেছ বিজয়ী হ’ব বুলি আত্মবিশ্বাসী।
আনহাতে ৰাজ্যখনৰ বিজেপি নেতৃত্বই নিৰ্বাচনী আয়োগৰ ঘোষণাটোক আদৰণি জনাইছে।
