এতিয়াও ৰহস্যৰ আৱৰ্তত ৰূপহীহাটৰ ঘটনা : খবৰ পায়ো বিদ্যুৎ বিভাগে সংযোগ কটা নাছিল নে এবাৰ সংযোগ কাটি আকৌ দিছিল?
নগাঁৱৰ ৰূপহীহাটত আজি পুৱাই ছিগি থকা বিদ্যুৎ তাঁৰত লাগি ৭জন লোকৰ মৃত্যু হোৱা দুৰ্ভাগ্যজনক ঘটনাটোৱে সমগ্ৰ ৰাজ্যবাসীক এতিয়াও শোকস্তব্ধ কৰি ৰাখিছে।
দুৰ্ভাগ্যজনক ঘটনাটোৰ বাবে মূলতঃ বিদ্যুৎ বিভাগকে দায়ী যদিও ছিগি পৰি থকা উচ্চ ক্ষমতাৰ বিদ্যুৎ পৰিবাহী তাঁৰডালত প্ৰথম অৱস্থাত বিদ্যুৎ নাছিল নে বিদ্যুৎ বিভাগে সংযোগ কাটি ৰাখিছিল সেই লৈ প্ৰশ্নৰ অৱতাৰণা হৈছে।
কাৰণ উচ্চ ক্ষমতাৰ বিদ্যুৎ পৰিবাহী তাঁৰডাল ছিগি পৰি থকাৰ পিছত স্থানীয় ৰাইজে বিদ্যুৎ বিভাগক খবৰ দিছিল। স্থানীয় ৰাইজে শক্তি বিভাগৰ স্থানীয় কৰ্মচাৰী ফকৰুল ইছলামক জনাইছিল ফোন কৰি। তেওঁ ওলোটাই বিদ্যুৎ সংযোগ বিছিন্ন কৰা বুলি জনাইছিল স্থানীয় ৰাইজক। সেই বিশ্বাসতে ৬জনকৈ লোক তাঁৰডাল পৰি থকা পুখুৰীত নামি মাছ মাৰিছিল।
প্ৰথমে অলপ মাছ ধৰাৰ পিছত লোককেইজন ভাত খাই আগৰ বিশ্বাসেৰে পুনৰ মাছ মাৰিবলৈ পুখুৰীত নামোতেই সংঘটিত হয় হৃদয়বিদাৰক ঘটনাটো। এজনৰ পিছত এজনকৈ মুঠ ৬জন লোক জীয়াই জীয়াই জ্বলি যায়।
অৱশ্যে এতিয়াও স্থানীয় লোকৰ মনত এই প্ৰশ্ন ৰৈ গৈছে- প্ৰথমবাৰ বিদ্যুৎ সংযোগ কৰ্তন যদি কৰিছিলেই, দ্বিতীয়বাৰ ছিগি পৰা তাঁৰডালেৰে কেনেকৈ বিদ্যুৎ প্ৰবাহিত হ’ল? নে প্ৰথমবাৰেই বিদ্যুৎ কৰ্তন কৰা হোৱা নাছিল?
ইপিনে ঘটনাটোৰ খবৰ ৰাষ্ট্ৰ হোৱাৰ লগে লগে গোটেই ৰাজ্যজুৰি চাঞ্চল্য সৃষ্টি হোৱাৰ পিছত মুখ্য মন্ত্ৰীৰ নিৰ্দেশ ক্ৰমে মন্ত্ৰী কেশৱ মহন্ত আৰু শক্তি মন্ত্ৰী তপন গগৈ ঘটনাস্থললৈ যায়। প্ৰাক্তন মুখ্য মন্ত্ৰী প্ৰফুল্ল কুমাৰ মহন্ত, স্থানীয় বিধায়ক নুৰুল হুদায়ো ঘটনাস্থলীলৈ যায়।
মন্ত্ৰী কেশৱ মহন্তই চৰকাৰৰ হৈ ঘটনাত নিহত প্ৰতিজনৰ বিপৰীতে তেওঁলোকৰ আত্মীয়লৈ ২.৫০ লাখ টকাকৈ ক্ষতিপূৰণ দিব বুলি ঘোষণা কৰিছে। আনহাতে, ঘটনা সন্দৰ্ভত বিদ্যুৎ বিভাগে তিনিজন বিষয়া-কৰ্মচাৰী ক্ৰমে বিভাগটোৰ এছ ডি অ’ পল্লৱ দাস, কৰ্মচাৰী ফকৰুল ইছলাম আৰু এগৰাকী কনিষ্ঠ অভিযন্তাক নিলম্বন কৰিছে।
আনহাতে দণ্ডাধীশ পৰ্যায়ৰ তদন্তও ঘোষণা কৰিছে নগাঁও জিলাৰ উপায়ুক্তই। আনহাতে এই কাণ্ডক লৈ ক্ষোভত ফাটি পৰিছে অঞ্চলবাসী। ক্ষুভিত জনতাই গৈ শক্তি বিভাগৰ কৰ্মচাৰীৰ ঘৰ-গাড়ী ভাঙি চূৰমাৰ কৰে। তেওঁলোক প্ৰতিবাদ সাব্যস্ত কৰাৰ লগতে দোষীক বিহিত ব্যৱস্থা ল’বলৈ সংশ্লিষ্ট কৰ্তৃপক্ষক দাবী জনাইছে।