গুৱাহাটী মহানগৰীৰ হেঙেৰাবাৰীত আজি ডাষ্টবিনত নিক্ষেপিত এটি নৱজাতকৰ মৃতদেহ উদ্ধাৰ হৈছে।
দিচপুৰ থানাৰ অন্তৰ্গত হেঙেৰাবাৰীৰ জীৱনকৃষ্ণ পথৰ জি এম চিৰ ডাষ্টবিনত উদ্ধাৰ হৈছে মৃত নৱজাতকটি।
জি এম চিৰ অধীনত কৰ্মৰত এজন চাফাইকৰ্মীয়ে প্ৰায় ১২ বজাত প্ৰথমে নবজাতকটি জাবৰৰ মাজত পৰি থকা দেখা পায়।
তাৰ পিছতে স্থানীয় লোক গোট খাই আৰু দিচপুৰ আৰক্ষীলৈ খবৰ দিয়ে।
দিচপুৰ থানাৰ আৰক্ষী ঘটনাস্থলীত উপস্থিত হৈ দুৰ্ভগীয়া নৱজাতকটিৰ মৃতদেহটো উদ্ধাৰ কৰে আৰু গুৱাহাটী মেডিকেল কলেজ এণ্ড হস্পিটেললৈ মৰণোত্তৰ পৰীক্ষাৰ বাবে প্ৰেৰণ কৰে।
স্থানীয় লোকৰ সন্দেহ, অবৈধ মাতৃত্বৰ বোজা লুকুৱাবলৈ কোনোবাই নৱজাতকটি এইদৰে ডাষ্টবিনলৈ নিক্ষেপ কৰে।
ঘটনাটো সন্দৰ্ভত দিচপুৰ আৰক্ষীয়ে নিজাববীয়াকৈ এটা গোচৰ ৰুজু কৰি তদন্ত আৰম্ভ কৰিছে।
