অল্ট নিউজৰ সহ-প্ৰতিষ্ঠাপক তথা সাংবাদিক মহম্মদ জুবেইৰক ২০১৮ চনৰ এটা টুইটৰ সৈতে সম্পৰ্কিত গোচৰত জামিন মঞ্জুৰ কৰিছে দিল্লীৰ এখন আদালতে। অৱশ্যে জামিন পালেও আন দুটা গোচৰত অভিযুক্ত হৈ থকা জুবেইৰ কাৰাগাৰতে থাকিব লাগিব।
দিল্লী আৰক্ষীয়ে তেওঁৰ ২০১৮ চনৰ এটা টুইটৰ জৰিয়তে ধৰ্মীয় আৱেগক আঘাত কৰাৰ অভিযোগত মহম্মদ জুবেইৰক ২৭ জুনত গ্ৰেপ্তাৰ কৰিছিল। প্ৰথমতে ভাৰতীয় দণ্ডবিধিৰ ধাৰা ১৫৩ আৰু ২৯৫ এ ৰ অধীনত অভিযুক্ত কৰা হৈছিল।
পিছত দিল্লী আৰক্ষীয়ে বিদেশী অনুদান লাভ কৰাৰ অভিযোগত জুবেইৰৰ বিৰুদ্ধে পুনৰ আইপিচিৰ ধাৰা ২০১, ১২০ বি আৰু বিদেশী অৱদান নিয়ন্ত্ৰণ আইনৰ ধাৰা ৩৫ প্ৰয়োগ কৰে।
জুবেইৰে এই গোচৰত জামিনৰ বাবে দিল্লীৰ এখন সত্ৰ আদালতত আবেদন কৰিছিল যদিও তেওঁৰ আবেদন নাকচ কৰিছিল আদালতে।
জুবেইৰৰ বিৰুদ্ধে মুঠ সাতখন এজাহাৰ পঞ্জীয়ন কৰা হৈছিল। ইয়াৰ ভিতৰত ছয়খন উত্তৰ প্ৰদেশত আৰু এখন দিল্লীত দাখিল কৰা হৈছে। দিল্লী, সীতাপুৰ, হাথৰাছ আৰু লখিমপুৰ খেৰীত তেওঁৰ বিৰুদ্ধে দাখিল কৰা চাৰিটা গোচৰৰ বাবে জিম্মাত আছে।
এই চাৰিটা গোচৰৰ ভিতৰত জুবেইৰে কেৱল সীতাপুৰ গোচৰত আৰু আজি দিল্লী গোচৰত অন্তৱৰ্তীকালীন জামিন লাভ কৰিছে। এতিয়াও লখিমপুৰ খেৰী গোচৰ আৰু হাথৰাছ গোচৰত জামিন লাভ কৰিবলৈ বাকী আছে তথ্য পৰীক্ষক গৰাকীয়ে।
উল্লেখ্য যে ১৯৮৩ চনত মুক্তি প্ৰাপ্ত এখন হিন্দী চলচ্চিত্ৰৰ এটা বিশেষ দৃশ্যৰ ফটো শ্বেয়াৰ কৰি চাৰি বছৰ পূৰ্বে কৰা এটা টুইটৰ বাবে দিল্লী আৰক্ষীয়ে ২৭ জুনত মহম্মদ জুবেইৰক প্ৰথমে গ্ৰেপ্তাৰ কৰিছিল।
তথ্য পৰীক্ষণৰ জৰিয়তে শাসনাধিষ্ঠিত বিজেপি চৰকাৰৰ বহু ভুৱা প্ৰচাৰৰ মুখা খুলি দিয়া বাবেই জুবেইৰক চক্ৰান্তমূলকভাৱে গ্ৰেপ্তাৰ কৰা বুলি অভিযোগ উত্থাপিত হৈছে।
স্মৰ্তব্য যে নুপূৰ শৰ্মাই পয়গম্বৰ হজৰত মহম্মদৰ বিৰুদ্ধে কৰা মন্তব্যৰ ভিডিঅ’ প্ৰথমে সাংবাদিক জুবেইৰেই ফেক্ট চেকিঙৰ জৰিয়তে ৰাজহুৱা কৰিছিল।
