দিল্লীৰ অৰবিন্দ কেৰজিৱাল চৰকাৰে দিল্লীৰ বিদ্যালয়সমূহৰ বাবে সুকীয়া শিক্ষা ব’ৰ্ড গঠন কৰিছে।
দিল্লী চৰকাৰে মংগলবাৰে দিল্লী ব’ৰ্ড অৱ স্কুল এডুকেশ্যন(DBSE) নামৰ সংস্থাটো গঠন কৰাৰ কথা ঘোষণা কৰিছে।
মংগলবাৰে দিল্লীৰ শিক্ষা সঞ্চালকালয়ৰ অফিচিয়েল টুইটাৰত কোৱা হৈছে, “এতিয়াৰ পৰা দিল্লীৰ নিজা শিক্ষা ব’ৰ্ড থাকিব। আজি দিল্লী শিক্ষা ব’ৰ্ড পঞ্জীয়ন কৰা হৈছে।”
Now Delhi has its own education board
Delhi Education Board got registered today.
Congratulations to our students, teachers and all the stakeholders!
This will bring the most awaited reform in our assessment system. #DelhiEducationBoard
— DIRECTORATE OF EDUCATION Delhi (@Dir_Education) March 16, 2021
দিল্লীৰ মুখ্যমন্ত্ৰী অৰবিন্দ কেজৰিৱালে পূৰ্বে ঘোষণা কৰা মতে দিল্লীৰ নতুনকৈ গঠন হোৱা শিক্ষা ব’ৰ্ডৰ অধীনত ২০২১-২২ শিক্ষা বৰ্ষত ২০ৰ পৰা ২৫ খন বিদ্যালয় থাকিব।
স্মৰ্তব্য যে যোৱা ৬ মাৰ্চত মুখ্যমন্ত্ৰী অৰবিন্দ কেৰজিৱালে দিল্লী চৰকাৰৰ কেবিনেট বৈঠকে দিল্লী শিক্ষা ব’ৰ্ড গঠনৰ প্ৰস্তাৱত অনুমোদন জনোৱা বুলি সংবাদ মাধ্যমৰ আগত প্ৰকাশ কৰিছিল।
দিল্লীৰ শিক্ষা মন্ত্ৰীগৰাকী অধ্যক্ষ হিচাপে থাকিবলগীয়া শিক্ষা ব’ৰ্ডৰ এখন গৰ্ভনিং ব’ডী আৰু এখন কাৰ্যকৰী ব’ডী থাকিব। দৈনন্দিন কামসমূহ সম্পাদ কৰিবলগীয়া কাৰ্যকৰী ব’ডীৰ এজন মুখ্য কাৰ্যকৰী বিষয়া(CEO) থাকিব।
দুয়োখন ব’ডীকে শিক্ষা আৰু ঔদ্যোগিক ক্ষেত্ৰৰ বিশেষজ্ঞৰ লগতে আইন নিৰ্ধাৰক, ব্যক্তিখণ্ড শিক্ষাখণ্ডৰ শিক্ষা বিশেষজ্ঞ আৰু আমোলাৰে গঠন কৰা হ’ব।
উল্লেখ্য যে দিল্লীৰ ১০০০ৰো অধিক চৰকাৰী আৰু ১৭০০ৰো অধিক ব্যক্তিগত খণ্ডৰ বিদ্যালয় কেন্দ্ৰীয় মাধ্যমিক শিক্ষা সংসদ(CBSE)ৰ অধীনত পৰিচালিত হৈ আহিছে।
আনহাতে যোৱা বৰ্ষৰ জুলাইত দিল্লী চৰকাৰে ৰাজ্যিক পৰ্যায়ৰ ব’ৰ্ডৰ পৰিকামাঠো আৰু পাঠ্যক্ৰম প্ৰস্তুতিৰ বাবে দুখন কমিটি গঠন দিছিল।
