যোৱা ২৬ জানুৱাৰি অৰ্থাৎ গণৰাজ্য দিৱসৰ দিনটোত দিল্লীত সংঘটিত হিংসাত্মক কাৰ্যকলাপ আৰু লালকিল্লাত নিচান চাহিবৰ পতাকা উৰুওৱা ঘটনাৰ মূল অভিযুক্ত দীপ সিদ্ধু, জুগৰাজ সিং, গুৰজোৎ সিং আৰু গুৰজন্ত সিঙৰ সন্ধান দিওতালৈ দিল্লী আৰক্ষীয়ে এক-এক লাখ টকাৰ পুৰস্কাৰ ঘোষণা কৰিছে।
এই কেইজন লোকৰ উপৰি আন কেইবাজনৰো বিৰুদ্ধে দিল্লী আৰক্ষীয়ে ৫০ হাজাৰ টকাৰ পুৰস্কাৰ ঘোষণা কৰি থৈছে।
ঘটনাৰ তদন্তৰ বাবে দিল্লী আৰক্ষীয়ে এটা বিশেষ অনুসন্ধানকাৰী দল গঠন কৰি দিছে। ইয়াৰ নেতৃত্বত আছে য়ুটীয়া আয়ুক্ত বি কে সিং আৰু তিনিগৰাকী উপ আৰক্ষী আয়ুক্ত।
গণৰাজ্য দিৱসৰ দিনটোত কৃষি আইন বাতিলৰ দাবীত কৃষকসকলে উলিওৱা ট্ৰেক্টৰ ৰেলীৰ সময়ত দিল্লীৰ ৰাজপথত ধংসাত্মক কাৰ্যকলাপ সংঘটিত হৈছিল।
তদুপৰি প্ৰতিবাদকাৰী কৃষকসকলৰ একাংশই বলপূৰ্বকভাৱে লালকিল্লাত প্ৰৱেশ কৰি তাৰ গম্বুজত নিজৰ পতাকা উৰুৱাইছিল।
দিল্লী আৰক্ষীয়ে লালকিল্লাৰ ঘটনা আৰু হিংসাত্মক কাৰ্যকলাপত জৰিত থকাৰ অভিযোগত পাঞ্জাৱী অভিনেতা দীপ সিদ্ধুৰ লগতে কেইবাজনৰো বিৰুদ্ধে এজাহাৰ দাখিল কৰিছে।
ইফালে দিল্লীৰ হিসাংত্মক ঘটনাৰ পিছৰে পৰা মূল অভিযুক্ত দীপ সিদ্ধু, প্ৰাক্তন গেংষ্টাৰ লক্খা ছিধানা আৰু লালকিল্লাত পতাকা উৰুওৱা জুগৰাজ সিং পলাতক অৱস্থাত আছে।
