ডিগবৈত সাংবাদিকৰ বিৰুদ্ধে ফে’চবুকত যুৱকৰ অপপ্ৰচাৰ; আৰক্ষীত গোচৰ ৰুজু
সাংবাদিকৰ বিৰুদ্ধে ছ’চিয়েল মেডিয়াত অশ্লিল মন্তব্য প্ৰকাশ কৰাৰ অভিযোগত ডিগবৈৰ সংবাদ মহলে বুধবাৰে ডিগবৈ আৰক্ষী থানাত প্ৰসেনজিত কুমাৰ ধৰ নামৰ এজন যুৱকৰ বিৰুদ্ধে এক গোচৰ ৰুজু কৰে।
উল্লেখযোগ্য যে যোৱা ১৭ অক্টোবৰ নিশা প্ৰায় ১২:৩০ মান বজাত ডিগবৈৰ চাৰিজন যুৱকে এগৰাকী ষোল্ল বছৰীয়া কিশোৰীক দলবদ্ধ ধৰ্ষণ কৰাৰ অভিযোগত ৰঙাঘৰৰ আলহী হ’ব লগা হৈছিল। এই বাতৰি স্থানীয় সাংবাদিকসকলে সবিস্তাৰে প্ৰকাশ কৰিছিল।
ইয়াৰ পিছতে যোৱা ২২ অক্টোবৰত ডিগবৈৰ শিৱবাড়ী এলেকাৰ অনুকূল ধৰৰ পুত্ৰ প্ৰসেনজিত কুমাৰ ধৰে তেওঁৰ ফে’চবুক একাউণ্টত ধৰ্ষণত অভিযুক্ত যুৱককেইজনৰ পক্ষ লৈ সাংবাদিকসকলক নানান অশ্লিল বাক্য প্ৰয়োগ কৰি অপমান কৰাৰ লগতে জনমানসত হেয় প্ৰতিপন্ন কৰাৰ চেষ্টা কৰে।
ইয়াৰ পৰিপ্ৰেক্ষিতত কালি ডিগবৈৰ সাংবাদিক সকলে ডিগবৈ আৰক্ষী থানাত গোচৰ তৰাত আৰক্ষীয়ে অভিযুক্ত প্ৰসেনজিতৰ বিৰুদ্ধে ভাৰতীয় দণ্ডবিধি আইনৰ ২৯৪/৬৬ ধাৰাত ২৭১/২০১৮ নম্বৰত এক গোচৰ পঞ্জীয়ন কৰি তদন্ত আৰম্ভ ৰাখিছে।
আনহাতে তিনিচুকীয়া জিলা সাংবাদিক সংস্থাৰ সম্পাদক মনোৰঞ্জন দাসে আজি এক বাৰ্তা যোগে প্ৰসেনজিতৰ বিৰুদ্ধে দৃষ্টান্তমূলক শাস্তি বিহিবলৈ আৰক্ষী প্ৰশাসনক দাবী জনায়।