শিৱসাগৰৰ কোৱামৰাত দিচাং নদীয়ে চপৰা-চপৰে খহাইছে গড়া। যোৱা বাৰিষাৰ পাছত দিচাং নদীৰ জল স্তৰ কমিবলৈ আৰম্ভ কৰাৰে পৰা নদীখনৰ খহনীয়াই এক ভয়ংকৰ ৰূপ ধাৰণ কৰি আহিছে অঞ্চলটোত।
কোৱামৰাত দিচাং নদীখনৰ খহনীয়াৰ প্ৰকোপ ইমান তড়িৎ গতিত অব্যাহত আছে যে আজি ৫ মাহৰ পূৰ্বে কাষৰ মথাউৰিটোৰ পৰা নদীখন প্ৰায় ৩০ মিটাৰ দূৰত্বৰে প্ৰৱাহিত হৈছিল যদিও খহনীয়াৰ বাবেই নদীখনৰ প্ৰৱাহ গতিৰ দূৰত্বৰ দৈৰ্ঘ সংকুচিত হৈ আহি এতিয়া মাথোঁ ১০ মিটাৰ মান পাইছে।
এনেদৰে নদীখনে খহনীয়া অব্যাহত ৰাখিলে কম দিনৰে ভিতৰতে কোৱামৰাৰ দিচাঙৰ মথাউৰিটো নদীত জাহ যোৱাৰ সম্ভাৱনা প্ৰকট হৈ পৰিছে।
উল্লেখ্য যে ষষ্ঠদশ শতিকাত মহাপুৰুষ শ্ৰীমন্ত শংকৰদেৱ গুৰু জনাৰ পৰিনাতি অনন্ত নাৰায়ণ আতাই স্থাপন কৰা ঐতিহাসিক কোৱামৰা সত্ৰ খন খহনীয়া স্থলীৰ পৰা কিছু নিলগত অৱস্থিত।
তদুপৰি ৬-৭ খন ৰাজহ গাঁৱৰ বহি:সমাজৰ লগত যোগাযোগৰ একমাত্ৰ মাধ্যম হৈছে এই মথাউৰিটো।
এনেদৰে খহনীয়াৰ প্ৰকোপত পৰি যিকোনো মুহূৰ্ততে মথাউৰিটো নদীৰ বুকুত বিলীন হৈ গলে ঐতিহাসিক সত্ৰ খনৰ লগতে শিৱসাগৰ জিলাৰ বৃহৎ এলেকা যে জলমগ্ন হৈ পৰিব সেয়া নিশ্চিত।
আনহাতে, নদী খনে তীব্ৰ গতিত অব্যাহত ৰখা গড়াখহনীয়া প্ৰতিৰোধ কৰাৰ ক্ষেত্ৰত শিৱসাগৰৰ জলসম্পদ বিভাগে সময়োপযোগী পদক্ষেপ গ্ৰহণ নকৰাত জনসাধাৰণৰ মাজত তীব্ৰ প্ৰতিক্ৰিয়াৰ সৃষ্টি হৈছে।
খহনীয়া প্ৰতিৰোধ কৰাৰ নামত বিভাগটোৱে মাথোঁ দুদাল মান বাহ পুতিয়ে দায়িত্ব সামৰাৰো অভিযোগ উঠিছে।
