কেলেংকাৰিৰ বিৰুদ্ধে সৰৱ হোৱাৰ পৰিণতি! : চিৰিয়াখানা সুৰক্ষা মঞ্চৰ সভাপতি-সম্পাদকৰ বিৰুদ্ধে ডি এফ অ’ৰ গোচৰ
চিৰিয়াখানাত চলি থকা দুৰ্নীতি, কেলেংকাৰি আৰু চিৰিয়াখানাৰ জীৱ-জন্তু মাৰি খোৱা বুলি গুৰুতৰ অভিযোগ উত্থাপন কৰি অহা চিৰিয়াখানা সুৰক্ষা মঞ্চৰ সভাপতি দীপক পাঠক আৰু সাধাৰণ সম্পাদক ৰাজকুমাৰ বৈশ্যৰ বিৰুদ্ধে অসম ৰাজ্যিক চিৰিয়াখানাৰ ডি এফ অ’ তেজস্ব মৰিস্বামীয়ে গীতানগৰ থানাত ভাৰতীয় দণ্ডবিধিৰ অধীনত ৩৩৫/১৮ আৰু ৫০০/৫০৫/৫০৬ নম্বৰৰ গোচৰ ৰুজু কৰিছে।
উল্লেখ্য যে, চিৰিয়াখানা সুৰক্ষা মঞ্চই যোৱা ২৬ জুলাইৰ দিনা চিৰিয়াখানাৰ সন্মুখত এখন প্ৰতিবাদী অৱস্থান ধৰ্মঘট কাৰ্য্যসূচী ৰূপায়ণ কৰিছিল আৰু সেই প্ৰতিবাদী কাৰ্য্যসূচীতে চিৰিয়াখানা সুৰক্ষা মঞ্চৰ সাধাৰণ সম্পাদক ৰাজকুমাৰ বৈশ্যই চিৰিয়াখানাৰ জীৱ-জন্তু হত্যা কৰি খোৱাৰ গুৰুতৰ অভিযোগ তুলিছিল।
এই অভিযোগ সম্পূৰ্ণ ভিত্তিহীন তথা ৰাইজৰ মানসত চিৰিয়াখানা তথা ডি এফ অ’ক হেয় প্ৰতিপন্ন কৰিবৰ বাবে এনেকুৱা অভিযোগ অনা বুলি ডি এফ অ’জনে থানাখনত গোচৰ ৰুজু কৰে।
আনহাতে, চিৰিয়াখানা সুৰক্ষা মঞ্চৰ সাধাৰণ সম্পাদকগৰাকীয়ে ১৫ আগষ্টৰ পৰা ২০ আগষ্টলৈকে ৩০টাকৈ জীৱ-জন্তুৱে মৃত্যুক সাৱটি লোৱা বুলি অনা অভিযোগক মিছা প্ৰচাৰ বুলি এজাহাৰখনত উল্লেখ কৰা হৈছে।
ডিএফঅ’গৰাকীয়ে কয়, “সুৰক্ষা মঞ্চৰ এনে মিছা প্ৰচাৰে জনসাধাৰণক বিপদত পেলাব পাৰে আৰু চিৰিয়াখানাৰ কৰ্মচাৰীসকল জীৱ-জন্তু উদ্ধাৰৰ বাবে বাহিৰলৈ গ’লে জনতাৰ আক্ৰোশৰ বলি হ’ব পাৰে।”
এজাহাৰত উল্লেখ কৰা অনুসৰি চিৰিয়াখানা সুৰক্ষা মঞ্চই তেওঁলোকৰ প্ৰতিবাদত তেওঁক বহিৰাগত শব্দ ব্যৱহাৰ কৰি তেওঁক বৰ্খাস্ত কৰাৰ লগতে ‘ডি এফ অ’ গ’ বেক’ ধ্বনি দিছিল।
ইফালে, চিৰিয়াখানা সুৰক্ষা মঞ্চই ডি এফ অ’গৰাকীয়ে দিয়া গোচৰ ভিত্তিহীন তথা চিৰিয়াখানাত চলি থকা কেলেংকাৰিসমূহ গাপ দিয়াৰ বাবে এনেধৰণে তেওঁলোকৰ বিৰুদ্ধে গোচৰ দিয়া হৈছে বুলি উল্লেখ কৰে।
সুৰক্ষা মঞ্চই লগতে কয় যে যদি চিৰিয়াখানা কৰ্তৃপক্ষই হৰিণ ভক্ষণ কৰাই নাই, তথা অসৎ উদ্দেশ্য নাই তেন্তে চিৰিয়াখানাৰ চৌপাশৰ দেৱালসমূহ নিৰ্মাণ কৰা নাই কিয়? নিয়ম অনুসৰি যদি মুক্ত বিচৰণৰ হৰিণ থাকে তেন্তে দেৱাল থকাটো অত্যন্ত জৰুৰী বুলি তেওঁ কয়।
ইয়াৰোপৰি তেওঁ কয় “চিৰিয়াখানাখনক ধ্বংসৰ গৰাহৰ পৰা ৰক্ষা কৰিবলৈ প্ৰতিবাদ কৰাটো গণতান্ত্ৰিক অধিকাৰ। এইটো খৰ্ব কৰিবৰ কাৰণে চিৰিয়াখানা কৰ্তৃপক্ষই চেষ্টা কৰিছে।”
আনহাতে, তেওঁ জানিবলৈ দিয়া অনুসৰি সংবিধানৰ ১৩ আৰু ১৪ নং অনুচ্ছেদ অনুসৰি যিকোনো এজন চৰকাৰী বিষয়াৰ দুষ্কাৰ্য্যৰ বিৰুদ্ধে সাধাৰণ ৰাইজে প্ৰতিবাদ সাব্যস্ত কৰিব পাৰে। লগতে বিষয়াগৰাকীৰ ওপৰত সন্দেহ হ’লে তাৰ ভিত্তিতো প্ৰতিবাদ কৰিব পাৰে বুলি তেওঁ কয়।
লগতে প্ৰতিবাদকাৰীসকলে জাতীয় সম্পদ জহিখহি যোৱাৰ বাবে খং আৰু ক্ষোভত গ’ বেকসূচক ধ্বনি দিব পাৰে বুলি তেওঁ দাবী কৰে।
ইয়াৰোপৰি চিৰিয়াখানা সুৰক্ষা মঞ্চই চিৰিয়াখানাত চলি থকা কেলেংকাৰিৰ বিৰুদ্ধে দীৰ্ঘদিন ধৰি তদন্ত দাবী কৰি আহিছে যদিও চৰকাৰৰ সংশ্লিষ্ট কৰ্তৃপক্ষই এই ক্ষেত্ৰত কোনো ধৰণৰ তদন্ত ঘোষণা কৰা নাই বুলি তেওঁ দাবী কৰাৰ উপৰি বাৰম্বাৰ কৈ অহা সত্ত্বেও বৰ্তমানো চিৰিয়াখানাৰ ভগ্ন দেৱালসমূহ মেৰামতি নকৰা বুলি তেওঁ আমাক কয়।