তিনিচুকীয়াৰ ধলাৰ হত্যাকাণ্ড ঘটনাটোক অসম বিৰোধী চক্ৰৰ ‘ষড়যন্ত্ৰ’ বুলি মন্তব্য কৰি ৰাইজক উত্তেজিত নহৈ সজাগ থাকিবলৈ আহ্বান জনাইছে বিশিষ্ট বুদ্ধিজীৱী ড০ হীৰেন গোহাঁয়ে।
ঘটনাটোত শোক প্ৰকাশ কৰি নাগৰিকত্ব আইন সংশোধন বিৰোধী মঞ্চই শুকুৰবাৰে গুৱাহাটী প্ৰে’ছ ক্লাবত আয়োজন কৰা সংবাদমেলত এই মন্তব্য কৰিছে মঞ্চৰ নেতা বুদ্ধিজীৱীগৰাকীয়ে।
“খেৰাবাৰীৰ ঘটনাটো অসম বিৰোধী চক্ৰৰ ষড়যন্ত্ৰৰ ফল। ষড়যন্ত্ৰকাৰী শক্তিবিলাকে এই হত্যাকাণ্ড সংঘটিত কৰিছে,” ঘটনাটোত আলফা (স্বাধীন) জড়িত নহয় বুলি সংগঠনটোৱে দিয়া স্পষ্টীকৰণৰ বিষয়েও উল্লেখ কৰি এই মন্তব্য গোহাঁইৰ।
শাসকীয় বিধায়কে বহু দিনৰে পৰা ‘প্ৰৰোচনামূলক’ মন্তব্য কৰি অহা বুলি উল্লেখ কৰি এনে মন্তব্যত উত্তেজিত নহৈ ‘দমন’ কৰিবলৈ সকলো শান্তিকামী দল-সংগঠন তথা ৰাইজক আহ্বান জনাইছে বুদ্ধিজীৱীজনে।
‘‘অসমৰ ৰাইজ নাগৰিকত্ব সংশোধনী বিধেয়কৰ বিৰুদ্ধে অসমৰ সকলো ৰাইজ ইতিমধ্যে ওলাই আহিছে। বহু দিনৰ পৰা চৰকাৰৰ বিভিন্ন বিধায়কে মানুহৰ মাজত অসৎ ভাব আৰু অবিশ্বাস সৃষ্টি কৰিবৰ বাবে চেষ্টা কৰি আহিছে। অসমৰ জনসাধাৰণৰ মাজত শান্তি বিচৰা দল-সংগঠনসমূহ প্ৰৰোচনামূলক মন্তব্যসমূহৰ পৰা উত্তেজিত নহ’ব,’‘ এই আহ্বান গোহাঁইৰ।
গোহাঁয়ে লগতে কয় যে এন আৰ চিক লৈ অসমৰ থলুৱা ৰাইজ ‘উদ্বিগ্ন তথা উৎসাহিত’ হোৱাৰ বিপৰীতে প্ৰক্ৰিয়াটোত ব্যাঘাত জন্মাবলৈ চৰকাৰে নানা ধৰণৰ কূটকৌশল প্ৰয়োগ কৰি আহিছে।
‘‘সুবোধ বিশ্বাসৰ ঘটনাটোৰ সময়ৰে পৰা অসমখনত অস্থিৰতাৰ সৃষ্টি হৈ আহিছে,” মন্তব্য গোহাঁইৰ।
আনহাতে আলফা নেতা মৃণাল হাজৰিকা আৰু জিতেন দত্তৰ দৰে বিজেপি বিধায়ক শিলাদিত্য দেব, মন্ত্ৰী ৰাজেন গোহাঁই আৰু বি টি চিৰ বাঙালী সংস্থাৰ নেতা সুৰজিত চৰকাৰকো কিয় গ্ৰেপ্তাৰ কৰা নাই বুলিও বিজেপি চৰকাৰক প্ৰশ্ন কৰিছে মঞ্চটোৱে।
‘‘যদি চৰকাৰে অসমৰ পৰিস্থিতি শান্ত কৰি সংঘাতমুক্ত কৰিব খুজিছে, তেন্তে কিয় আজিৰ তাৰিখলৈকে শিলাদিত্য, ৰাজেন গোহাঁই আৰু বাঙালী নেতা সুৰজিৎ চৰকাৰ আটক হোৱা নাই?” চৰকাৰক প্ৰশ্ন মঞ্চৰ আহ্বায়ক মনজিৎ মহন্তৰ।
মঞ্চৰ আন এজন নেতা জ্যেষ্ঠ সাংবাদিক হাইদৰ হুছেইনে ধলাৰ ঘটনাটো নাগৰিকত্ব সংশোধনী বিধেয়কৰ বিৰুদ্ধে সাব্যস্ত হোৱা প্ৰতিবাদ মষিমূৰ কৰিবৰ বাবে ‘ষড়যন্ত্ৰমূলক’ভাৱে কৰোৱাৰো আশংকা কৰিছে। “ৰাজনৈতিক ষড়যন্ত্ৰকাৰীৰ পৃষ্ঠপোষকতাত ঘটনাটো সংঘটিত কৰিব পাৰে বুলি কিছুসংখ্যকে আশংকা কৰিছে,’‘ মন্তব্য হুছেইনৰ।
মঞ্চই হত্যাকাণ্ডটোৰ এন আই এ’ পৰ্য্যায়ৰ তদন্তৰ দাবী কৰিছে।
