ডিব্ৰুগড় আৰক্ষীয়ে বনকৰা নাবালকৰ গাত উতলা পানী ঢলাত অভিযুক্ত পলাতক চিকিৎসক ডাঃ সিদ্ধি প্ৰসাদ দেউৰীৰ পুত্ৰ, কন্যাক বৃহস্পতিবাৰে আটক কৰিছে।
পুত্ৰ, কন্যা দুগৰাকীক প্ৰিয়াংশু আৰু উপাসনা দেউৰী বুলি চিনাক্ত কৰা হৈছে।
নৰ্থইষ্ট নাওৰ সৈতে হোৱা কথা-বাৰ্তাত ডিব্ৰুগড়ৰ অতিৰিক্ত আৰক্ষী অধীক্ষক (হেড্কুৱাৰ্টাৰ) পদ্মনাভ বৰুৱাই কয়, “আমি ডাঃ সিদ্ধি প্ৰসাদ দেউৰীৰ পুত্ৰ আৰু কন্যাক জেৰাৰ বাবে আনিছো। আমাৰ আৰক্ষীৰ দলে ডাঃ দেউৰী আৰু তেওঁৰ পত্নী মিতালী কোঁৱৰৰ সন্ধান চলাই আছে। আমি তেওঁলোকৰ বিৰুদ্ধে আইনমতে কঠোৰ ব্যৱস্থা ল’ম।”
অভিযোগমতে ২৭ আগষ্টৰ ৰাতি ডাঃ দেউৰীয়ে ঘৰৰ মজিয়াত শুই থকা বনকৰা নাবালকজনৰ গাত উতলা পানী ঢালি দিছিল।
২৯ আগষ্টত চাইল্ডলাইন, শিশু কল্যাণ সমিতি আৰু আৰক্ষীৰ দলে দেউৰীৰ ঘৰৰ পৰা নাবালকজনক উদ্ধাৰ কৰিছিল।
বুধবাৰে চিকিৎসকগৰাকীৰ ঘৰলৈ যোৱা মিলন নগৰ আৰক্ষী চকীৰ আৰক্ষীৰ দল তেওঁৰ বন্ধ গেটৰ সন্মুখত বহু ঘণ্টাধৰি অপেক্ষা কৰিব লগা হয়।
পিছত আৰক্ষীয়ে দণ্ডাধীশক খবৰ দিয়ে আৰু দণ্ডাধীশৰ উপস্থিতিত চিকিৎসকগৰাকীৰ ঘৰত গেট বগাই প্ৰৱেশ কৰে।
সূত্ৰমতে, দেউৰীৰ ঘৰ ভিতৰৰ পৰা বন্ধ আছিল আৰু তেওঁলোকে ঘৰত কুকুৰ মুকলি কৰি ৰাখিছিল।
আৰক্ষীয়ে বহু ঘণ্টাধৰি ডাঃ দেউৰী আৰু পত্নী মিতালী কোঁৱৰক ঘৰত বিচাৰে যদিও কোনো সন্ধান পাবলৈ সক্ষম নহ’ল।
ডিব্ৰুগড়ৰ অতিৰিক্ত আৰক্ষী অধীক্ষক (হেড্কুৱাৰ্টাৰ) পদ্মনাভ বৰুৱাই নৰ্থইষ্ট নাওক জনাইছিল, “আমি শিশু শ্ৰমিক আইন আৰু কিশোৰ ন্যায় আইনৰ অধীনত গোচৰ পঞ্জীয়ন কৰিছো। আমি অভিযুক্ত ডাঃ সিদ্ধি প্ৰসাদ দেউৰীক বিচাৰি আছো আৰু আইনমতে ব্যৱস্থা লোৱা হ’ব।”
১২ বছৰীয়া শিশুটিয়ে দেউৰীৰ ঘৰত বনকৰা ল’ৰা হিচাপে কাম কৰি আহিছিল।
সংবাদ মাধ্যমৰ সৈতে হোৱা কথা-বাৰ্তাত শিশুটিয়ে কয় যে ঘৰৰ মজিয়াত ৰাতি শুই থাকোতে ডাঃ সিদ্ধি প্ৰসাদ দেউৰীয়ে গাত উতলা পানী ঢালি দিয়ে।
শিশুটিয়ে জনোৱা মতে তেওঁলোকৰ সকলো ঘৰুৱা কাম তেওঁ কৰি আহিছে।
শিশুটিয়ে লগতে জনাই যে তেওঁৰ ঘৰ যোৰহাটত, কিন্তু দেউতাকৰ লগত যোগাযোগ কৰিবলৈ তাক দিয়া নহয়।
শিশু কল্যাণ সমিতিৰ এজন সদস্যই জনোৱা মতে তেওঁলোকে শিশুটিৰ প্ৰকৃত ঘৰৰ ঠিকনা বিচৰাত চিকিৎসকজনে সেয়া জনোৱা নাছিল আৰু শিশুটি তেওঁলোকৰ সম্পৰ্কীয় আৰু দেউৰী উপাধিৰ বুলি কৈছিল।
কিন্তু পিছত পোহৰলৈ আহে যে শিশুটিৰ উপাধি ভূঞাহে।
ডাঃ দেউৰী ডিব্ৰুগড়ৰ অসম চিকিৎসা মহাবিদ্যালয় হস্পিটেলৰ চিকিৎসক আৰু পত্নী মিতালী কোঁৱৰ মৰাণ কলেজৰ অধ্যক্ষা।
