বানপানীৰ সতৰ্কবাণীৰ পাছত ডিব্ৰুগড়-ধেমাজিৰ মাজত অনিৰ্দিষ্ট কাললৈ ফেৰী সেৱা বন্ধ প্ৰশাসনৰ
ভূমিস্খলনৰ ফলত তিব্বতেৰে বৈ অহা ব্ৰহ্মপুত্ৰৰ মূল প্ৰৱাহ য়াৰ্লুং চাংপোত সৃষ্টি হোৱা বান্ধ হ্ৰদটো ভাঙি নামি অহা বিপুল পৰিমাণৰ জল প্ৰৱাহে ধেমাজি, ডিব্ৰুগড়, লখিমপুৰ আৰু তিনিচুকীয়া জিলাত বানপানীৰ সতৰ্কবাণী জাৰী কৰাৰ পাছত ডিব্ৰুগড় জিলা প্ৰশাসনে ডিব্ৰুগড় আৰু ধেমাজি জিলাৰ মাজত ফেৰী সেৱা অনিৰ্দিষ্ট কালৰ বাবে বন্ধ কৰি দিছে।
ইতিমধ্যে যোৱা নিশা ভাৰতীয় বায়ুসেনা বাহিনীৰ বিশেষ বিমানযোগে ৰাষ্ট্ৰীয় দুৰ্যোগ প্ৰশমণ বাহিনীৰ ৬টা দল কলকাতাৰ পৰা ডিব্ৰুগড়ৰ মোহনবাৰী বিমানঘাটী আহি পাইছেহি। ৬টা দলত মুঠ ১৫০ গৰাকী সদস্য আছে আৰু ৩৬টন সা-সৰঞ্জাম আছে।
ইয়াৰে ৪টা দলক ধেমাজিলৈ এটা দলক তিনিচুকীয়ালৈ প্ৰেৰণ কৰা হৈছে আৰু এটা দলক ডিব্ৰুগড়ত ৰখা হৈছে।
আনহাতে, পৰিস্থিতিৰ সৈতে মোকাবিলা কৰাৰ বাবে ২০০জনীয়া ৰাষ্ট্ৰীয় দুৰ্যোগ প্ৰশমণ বাহিনীৰ ৮টা দল পাছিঘাটত অৱতৰণ কৰোৱা হৈছে।
পাছিঘাটত পানী বাঢ়ি আছে কিন্তু ১৪৯.৫০ মিটাৰত বিপদসীমাৰ তলেৰে বৈ আছে। পাছিঘাটত বিপদসীমা হৈছে ১৫৩.৯৬ মিটাৰ।
আনহাতে ডিব্ৰুগড়তো পানী হ্ৰাসৰ প্ৰৱণতাৰে ১০৩.৩২ মিটাৰ ওপৰেৰে বৈ আছে। ডিব্ৰুগড়ৰ ব্ৰহ্মপুত্ৰৰ বিপদসীমা হৈছে ১০৫.৭০ মিটাৰ।
উল্লেখ্য দুৰ্যোগ প্ৰশমণৰ আগতীয়া প্ৰস্তুতি হিচাপে প্ৰশাসনে এই ব্যৱস্থাসমূহ গ্ৰহণ কৰিছে। উৰা বাতৰিৰ দ্বাৰা প্ৰভাৱিত হৈ আতংকিত নহ’বলৈ প্ৰশাসনে জনসাধাৰণলৈ আৱেদন জনাইছে।