ডিমা হাছাও জিলাৰ ষষ্ঠ অনুসূচীৰ অধীনত থকা ৩ হাজাৰ বিঘা জনজাতি সংৰক্ষিত ভূমি মহাবল চিমেণ্ট কোম্পানীক আবণ্টন কৰাৰ বিষয়টোক লৈ গুৱাহাটী উচ্চ ন্যায়ালয়ে তীব্ৰ উদ্বেগ প্ৰকাশ কৰিছে। বুধবাৰে এই বিষয়ৰ ৰাজহুৱা স্বাৰ্থ জড়িত গোচৰৰ তৃতীয় শুনানিত ন্যায়াধীশ সঞ্জীৱ কুমাৰ মেধিৰ এজনীয়া বিচাৰপীঠে অসম চৰকাৰ আৰু উত্তৰ কাছাৰ পাৰ্বত্য স্বায়ত্তশাসিত পৰিষদৰ পক্ষৰ পৰা উত্থাপিত যুক্তিসমূহক কঠোৰভাৱে পৰীক্ষা কৰে। চৰকাৰী পক্ষই স্বীকাৰ কৰিছে যে এই ভূমি বিক্ৰি কৰা নাই মাত্ৰ ৩০ বছৰলৈ লীজত দিয়া হৈছে, আৰু পৰিষদে প্ৰতি বিঘাত বছৰি মাত্ৰ ২৫০ টকাহে ৰাজহ লাভ কৰিব।
শুনানিত অসম চৰকাৰৰ মহাধিবক্তা দেৱজিৎ শইকীয়াই ন্যায়ালয়ক অৱগত কৰে যে এই আবণ্টনৰ ফলত কোম্পানীটোৱে ১১ হাজাৰ কোটি টকা বিনিয়োগ কৰিব আৰু ৰাজ্যৰ অৰ্থনৈতিক উন্নয়নত ইয়াৰ ভূমিকা গুৰুত্বপূৰ্ণ। তেওঁ উদাহৰণ দাঙি ধৰি কয় যে পূৰ্বে নীপকো জলবিদ্যুত প্ৰকল্পক ২১ হাজাৰ বিঘা আৰু নুমলীগড় শোধানাগাৰক ৪,৪৭০ বিঘা ভূমি আবণ্টিত হৈছে। কিন্তু ন্যায়াধীশ মেধিয়ে প্ৰশ্ন কৰি কয়, “আপুনি নীপকোক চিমেণ্ট কোম্পানী এটাৰ লগত তুলনা কৰিছে?” লগতে, ৩ হাজাৰ বিঘাৰ ভিতৰত প্ৰায় ১,০২০ বিঘা গ্ৰীণবেল্টৰ অধীনত পৰিব বুলি চৰকাৰী পক্ষই জনায়।
চিমেণ্ট উদ্যোগৰ ফলত জৈৱ-বৈচিত্ৰ্য আৰু পৰিৱেশৰ ওপৰত পৰা প্ৰভাৱক লৈ ন্যায়ালয়ে উদ্বিগ্নতা প্ৰকাশ কৰি কেন্দ্ৰীয় পৰিৱেশ মন্ত্ৰালয়কো গোচৰত পক্ষ কৰি লোৱাৰ পোষকতা কৰে, য’ত চৰকাৰী পক্ষই সন্মতি প্ৰকাশ কৰে।
চৰকাৰী পক্ষই জনোৱা মতে উত্তৰ কাছাৰ পাৰ্বত্য পৰিষদে চিলিং আইনখন বলবৎ কৰা নাছিল । The Assam Fixation of Ceiling On Land Holdings Act, 1956 ত এই কথা উল্লেখ আছে বুলি ন্যায়ালয়ত তথ্য দাঙি ধৰে মহাধিবক্তাগৰাকীয়ে ৷ আনহাতে, তাৰ এবছৰৰ আগত এন চি হিলছ পৰিষদ ১৯৫৫ চনত গঠিত হৈছিল । অসমৰ ভিতৰত গোৱালপাৰা, ধুবুৰী, কোকৰাঝাৰ, বঙাইগাঁও, বৰপেটা, নলবাৰী, কামৰূপ, লখিমপুৰ, দৰং, শোণিতপুৰ, ধেমাজি, নগাঁও, মৰিগাঁও, যোৰহাট, কাছাৰ, কৰিমগঞ্জ, হাইলাকান্দি, ডিব্ৰুগড়, তিনিচুকীয়াতহে এইখন আইন সম্প্ৰতি প্ৰযোজ্য ৷
ইয়াৰ উপৰিও, কোম্পানীটোৱে ৩ হাজাৰ বিঘা মাটিত কেৱল চিমেণ্ট কাৰখানা নহয়, কৰ্মচাৰীসকলৰ বাবে বাসগৃহ, স্কুল, হাস্পতাল, বজাৰ আদি আন্তঃগাঁথনি নিৰ্মাণ কৰিব বুলি চৰকাৰী পক্ষই জনায়।
চৰকাৰৰ অবিবেচানামূলক সিদ্ধান্তৰ বাবে সাধাৰণ ৰাইজে জীয়াতু ভুগি আহিছে। সাধাৰণ ৰাইজৰ এতিয়া আদালতে শেষ ভৰষা হৈ পৰিছে।
