কাৰ্বি আংলঙত আজি “নৰেন্দ্ৰ মোদী গ’ বেক” ধ্বনি তুলিলে ছাত্ৰ-ছাত্ৰীসকলে।
আজি জিলাখনৰ ডিফু চহৰত ডিফু আঞ্চলিক ছাত্ৰ সন্থা, কাৰ্বি আংলং ষ্টুডেণ্টছ এছ’চিয়েশ্যন (এছ আৰ), সদৌ ডিমাছা ছাত্ৰ সন্থা আৰু স্থানীয় নাগৰিকসকলে CAA-ৰ বিৰোধিতাত জোঁৰ সমদল উলিয়ায়।
সমদল কৰি যোৱা প্ৰতিবাদকাৰীয়ে বিতৰ্কিত আইনখন বাতিল কৰিবলৈ দাবী জনোৱাৰ লগতে “নৰেন্দ্ৰ মোদী গ’ বেক”, “সৰ্বানন্দ সোণোৱাল হুঁচিয়াৰ” ধ্বনি দিয়ে।
ছেমচং চিং ইংতি মেমৰিয়েল পাৰ্কৰ পৰা জোঁৰ সমদলটো আৰম্ভ কৰি প্ৰতিবাদকাৰীসকলে বজাৰ হৈ ঘূৰি আহি পুনৰ পাৰ্কত সমবেত হয়।
সমদলৰ শেষত প্ৰতিবাদকাৰীসকলৰ সন্মুখনত ভাষণ দি ডিফু আঞ্চলিক ছাত্ৰ সন্থাৰ সাধাৰণ সম্পাদক চৰ্জন হানছেই কয়, “যদিহে এই আইনখন বাতিল কৰা নহয়, তেন্তে ই অসমক ধ্বংস কৰিব। ইয়াক গ্ৰহণ কৰিব নোৱাৰি। ধৰ্ম, ভাষা, জাতি নিৰ্বিশেষে আমি ইয়াৰ বিৰুদ্ধে যুঁজ দিয়া উচিত”
তেওঁ অভিভাৱকসকলক তেওঁলোকৰ সন্তানসকলক আন্দোলনটোত অংশগ্ৰহণ কৰি ইয়াক আগুৱাই নিয়াৰ সুযোগ দিবলৈও অনুৰোধ জনায়।
চৰকাৰ তথা বিজেপি দলৰ শান্ত সমদল উলিওৱা কাৰ্য্যক সমালোচনা কৰি হানছেই কয়, “শান্তি সমদল উলিওৱাৰ পৰিৱৰ্তে অসম চৰকাৰে মোদীক কৈ দিয়ক যে উত্তৰ-পূৰ্বাঞ্চলত এই আইনখন বাতিল কৰিব লাগিব”।
শান্তি সমদলক ২০২১ চনৰ নিৰ্বাচনৰ প্ৰচাৰ বুলিও দাবী কৰে নেতাজনে।
আজি বকলীয়াঘাটততো সদৌ অসম ছাত্ৰ সন্থাৰ বকলীয়াঘাট গোটৰ দ্বাৰা CAA বিৰোধী প্ৰতিবাদ উলিওৱা হয়।
হিন্দীভাষী সমাজ, বেংগালী সমাজ, শ্ৰীমন্ত শংকৰদেৱ সংঘ, কাৰ্বি ষ্টুডেণ্টছ এছ’চিয়েশ্যন, মাৰৱাৰী সমাজ, অসম জাতীয়তাবাদী যুৱ ছাত্ৰ পৰিষদেও ইয়াত সহযোগ কৰে।
বকলীয়াঘাট উচ্চতৰ মাধ্যমিক বিদ্যালয়ৰ খেলপথাৰৰ পৰা প্ৰতিবাদী সমদল আৰম্ভ হৈ পি ডব্লিউ ডি কলনিলৈকে গৈ পুনৰ খেলপথাৰলৈ ঘূৰি আহে।
প্ৰতিবাদকাৰীসকলে CAA-ৰ বিৰুদ্ধে, প্ৰধান মন্ত্ৰী মোদী, গৃহ মন্ত্ৰী অমিত শ্বাহ, মুখ্য মন্ত্ৰী সৰ্বানন্দ সোণোৱালৰ বিৰুদ্ধে শ্ল’গান দিয়ে।
