চকুৰ পলকতে নিশাটোৰ ভিতৰতে তেওঁ ছ’চিয়েল মিডিয়াৰ পেজত বিয়পি পৰিছিল। প্ৰিয়া প্ৰকাশ ভেৰিয়াৰক মনত আছেনে? তেওঁৰ ইংগিতধৰ্মী চকুৰ টিপক লৈও বহু বিতৰ্কৰ সৃষ্টি হৈছিল। ওমৰ লুলুৰ পৰিচালনাত নিৰ্মিত ‘অৰু আদাৰ লাভ’ ছবিখনৰ এই দৃশ্য মুহূৰ্ততে ফেচবুকত বিয়পি পৰিছিল।
শেহতীয়াকৈ এটা সাক্ষাৎকাৰত সেই বিশেষ দৃশ্যটোৰ বিষয়ে আলোচনা হৈছিল। সেই দৃশ্যটোৰ বিষয়ে প্ৰিয়াক সোধাত অভিনেত্ৰীগৰাকীয়ে দাবী কৰিছিল যে এই সকলোবোৰ তেওঁৰ কৃতিত্ব। তেওঁৰ কথা শুনি ক্ষুব্ধ হৈ পৰে পৰিচালক।
ওমৰ অলপ বিচলিত হৈ উঠিল। তেওঁ প্ৰিয়াক স্মৃতিশক্তি ঘূৰাই আনিবলৈ দৰৱ খাবলৈ ক’লে। ওমৰে কয়, ‘আচলতে পাঁচ বছৰ হৈ গ’লতো, মোৰ বাচ্চাৰ স্মৃতিভ্ৰংশ হৈছে। প্ৰিয়াই ভাল্ল্যাচন্দনাদি দৰৱ খোৱাৰ প্ৰয়োজন।” স্মৃতিশক্তি ঘূৰাই অনাৰ বাবে চিকিৎসকে প্ৰেছক্ৰিপচন কৰা এবিধ আয়ুৰ্বেদিক দৰৱ হৈছে ভাল্ল্যাচন্দনাদি।
ওমৰে দাবী কৰিছে যে এই দৃশ্যটোৰ গোটেই ধাৰণাটো তেওঁৰ মনৰ পৰা আহিছিল। পাঁচ বছৰ পূৰ্বে দিয়া এক সাক্ষাৎকাৰতো পৰিচালকগৰাকীয়ে এই কথা কৈছিল। প্ৰিয়াৰো সেই সময়ত একেই বক্তব্য আছিল। তেওঁ কৈছিল যে ‘’পৰিচালকেই মোক তেনেকৈ চকুৰে ইংগিত দিবলৈ কৈছিল।‘’ ইমান দিনৰ মূৰত অভিনেত্ৰীগৰাকীৰ নতুন বক্তব্য শুনি বিচলিত হৈ পৰে পৰিচালক ওমৰ।
যি কাজলসনা চকুৰ ইংগিতেৰে দৰ্শকৰ হৃদয় বিদ্ধ কৰি তুলিছিল, সেই দৃশ্যক কেন্দ্ৰ কৰি হায়দৰাবাদৰ দুজন লোকে গোচৰ ৰুজু কৰিবলৈও গৈছিল। অৱশ্যে ততাতৈয়াকৈ গোচৰটো খাৰিজ কৰা হয়। ‘চকুৰ টিপ মৰাকলৈও আদালতত’- উচ্চতম ন্যায়ালয়ৰ মুখ্য ন্যায়াধীশৰ বিচাৰপীঠে তীব্ৰ ভৎসৰ্নাৰে এই গোচৰ খাৰিজ কৰে। হায়দৰাবাদৰ দুই “গোচৰকাৰী”ক মুখ্য ন্যায়াধীশ দিপক মিশ্ৰই কয়, “আপোনালোকৰ আৰু একো কাম নাই নেকি?”। কেৱল সেয়াই নহয়, ভৱিষ্যতেও ইয়াকলৈ আৰু কোনো গোচৰ ৰুজু কৰিব নোৱাৰিব বুলি স্পষ্ট কৰি দিয়ে উচ্চতম ন্যায়ালয়ে।
আবেদনকাৰীৰ যুক্তি আছিল যে ‘মানিক্যা মালাৰায় পুবি’ গীতটো মুছলমান নবী হজৰত মহম্মদৰ প্ৰথমা পত্নী খাদিজা বিবিৰ প্ৰতি প্ৰেমৰ প্ৰতীক হিচাপে ব্যৱহাৰ কৰা হয়। এই গীতটো কেৰালাৰ মালাবাৰ অঞ্চলৰ মুছলমান সম্প্ৰদায়ৰ মাজত জনপ্ৰিয়। সেয়ে ধৰ্মীয় আৱেগ মিহলি থকা এনে এটা গীতৰ অপব্যৱহাৰ কৰা হৈছে আৰু সেই গীতত চকু টিপ মৰা দৃশ্য চিত্ৰিত কৰি প্ৰিয়াই ইছলামৰ আৱেগক আঘাত কৰিছে।
