Johnny Depp: জনি ডেপক জেক স্পেৰো চৰিত্ৰত পৰ্দালৈ উভতিবলৈ ২৫৩৫ কোটি টকাৰ প্ৰস্তাৱ ডিজনীৰ!
Johnny Depp যোৱা কেইসপ্তাহমানত, জনি ডেপৰ জীৱনত এক ধুমুহা সৃষ্টি হৈছে। তেওঁৰ প্ৰাক্তন পত্নী, অভিনেত্ৰী এম্বাৰ হাৰ্ডৰ বিৰুদ্ধে মানহানিৰ গোচৰত যুঁজ দি আছিল আৰু ইয়াকে লৈ গোটেই চলচ্চিত্ৰ জগত উত্তাল হৈ পৰিছিল। এতিয়া অভিনেতাজনে ৫০ নিযুত ডলাৰৰ মানহানিৰ গোচৰ জিকি তেওঁৰ কেৰিয়াৰৰ মাজলৈ ঘূৰি আহিবলৈ পাবলৈ ব্যাকুল হৈ পৰিছে।
শেহতীয়াকৈ এক আন্তঃৰাষ্ট্ৰীয় সংবাদ মাধ্যমৰ বাতৰি অনুসৰি ডিজনীয়ে (Disney) অভিনেতাজনলৈ ক্ষমা বিচাৰি এখন পত্ৰ প্ৰেৰণ কৰিছে। লগতে পাইৰেটছ অফ দ্য কেৰিবিয়ানত জেক স্পেৰো চৰিত্ৰত উভতি আহিবলৈ ২,৫৩৫ কোটি টকাৰ প্ৰস্তাৱ আগবঢ়াইছে। জনিয়ে জনপ্ৰিয় এই চলচ্চিত্ৰ ফ্ৰেঞ্চাইজিৰ মুঠ পাঁচখন চলচ্চিত্ৰতে জেক স্পেৰোৰ চৰিত্ৰত অভিনয় কৰিছে।
জনি ডেপে তেওঁৰ প্ৰাক্তন পত্নী এম্বাৰ হাৰ্ডৰ বিৰুদ্ধে মানহানিৰ গোচৰটো জিকিছে। ছয় সপ্তাহ ধৰি ভাৰ্জিনিয়াৰ ফেয়াৰফেক্সত বিচাৰ অনুষ্ঠিত হৈছিল। অভিনেতাজনে তেওঁৰ প্ৰাক্তন পত্নীৰ বিৰুদ্ধে ২০১৮ চনত ৱাশ্বিংটন পোষ্টত প্ৰকাশ পোৱা এক অ’প-এড সংক্ৰান্তত মানহানিৰ গোচৰ ৰুজু কৰিছিল।
লেখনিটোত জনিৰ প্ৰাক্তন পত্নী এম্বাৰে নিজকে ঘৰুৱা হিংসাৰ বলি বুলি বৰ্ণনা কৰিছিল। সেইটোৱে জনি ডেপৰ কেৰিয়াৰক সাংঘাতিকভাৱে প্ৰভাৱিত কৰিছিল। ইয়াৰ বাবে অভিনেতাজনে ছবিৰ প্ৰস্তাৱ পোৱা নাছিল। ফেণ্টাষ্টিক বিষ্ট ৩ আৰু পাইৰেটছ অফ দ্য কেৰিবিয়ানৰ দৰে চলচ্চিত্ৰ তেওঁৰ হাতৰ পৰা গুচি গৈছিল।
জনিয়ে অলপতে মানহানিৰ গোচৰটো জিকাৰ পিছত অনুৰাগীসকলে ছ’চিয়েল মিডিয়াত ডিজনীক অভিনেতাজনৰ ওচৰত ক্ষমা বিচাৰিবলৈ দাবী জনাইছিল।
অষ্ট্ৰেলিয়াৰ Poptopic.com নামৰ ছাইটটোৰ মতে ডিজনীয়ে ইতিমধ্যে জনিলৈ ক্ষমা বিচাৰি এখন পত্ৰ প্ৰেৰণ কৰিছে। কেৱল সেয়াই নহয়, প্ৰযোজনা সংস্থাটোৱে তেওঁক পাইৰেটছ অফ দ্য কেৰিবিয়ানত জেক স্পেৰোৰ ভূমিকালৈ ঘূৰি আহিবলৈ ভাৰতীয় মুদ্ৰাত ২,৫৩৫ কোটি টকা আগবঢ়াইছে বুলি জানিব পৰা গৈছে।
অৱশ্যে, অভিনেতা বা তেওঁৰ দলৰ পৰা এই বিষয়ত কোনো আনুষ্ঠানিক ঘোষণা কৰা হোৱা নাই। দৰাচলতে, বাতৰিটো সন্দেহজনক বুলি অনুমান কৰা হৈছ কিয়নো ডিজনীয়ে দিয়া পৰিমাণ (২৫৩৫ কোটি টকা) মানহানিৰ গোচৰত জনি ডেপে উল্লেখ কৰা পৰিমাণৰ প্ৰায় সমান।
জনিয়ে অলপতে কৈছিল যে তেওঁ পাইৰেটছ অফ দ্য কেৰিবিয়ানত জেক স্পেৰো হিচাপে তেতিয়ালৈকে ঘূৰি নাহে যেতিয়ালৈকে তেওঁক ৩০১ নিযুত ডলাৰৰ দৰে বৃহৎ পাৰিশ্ৰমিক পৰিশোধ কৰা নহয়।