দীৰ্ঘদিন ধৰি মোবাইল লেপটপ ইত্যাদি চুৰি বস্তু কম দামত কিনি অধিক দামত বিক্ৰী কৰা কাৰ্য্যত লিপ্ত হৈ থকা দিচপুৰ আইন মহাবিদ্যালয়ৰ এজন ছাত্ৰক বৃহস্পতিবাৰে নিশা ফাঁচিবাজাৰ আৰক্ষীয়ে গ্ৰেপ্তাৰ কৰে।
ফাঁচিবজাৰ আৰক্ষী চকীৰ ভাৰপ্ৰাপ্ত আৰক্ষী বিষয়া তন্ময় নাথে জানিবলৈ দিয়া মতে ধৃত যুৱকজনক ধুবুৰী বিলাসীপাৰাৰ হজৰত আলীৰ পুত্ৰ হাৰুণ আলী (২৩) বুলি চিনাক্ত কৰা হৈছে।
প্ৰাপ্ত তথ্য মতে কালি বিয়লি প্ৰায় ২ বজাত ফাঁচিবজাৰৰ ৩ নং ৰে’লৱে গেটৰ পৰা ফাঁচিবজাৰ আৰক্ষীয়ে গোপন এক সূত্ৰৰ পম খেদি সোধ-পোচৰ বাবে হাৰুণক আটক কৰে। আৰক্ষীৰ জেৰাত হাৰুণে চুৰি কৰা বস্তু ক্ৰয় কৰি বিক্ৰী কৰি অহাৰ কথা স্বীকাৰ কৰে।
ইয়াৰ ভিত্তিত ধৃত হাৰুণৰ বিৰুদ্ধে ফাঁচিবজাৰ আৰক্ষীয়ে ভাৰতীয় দণ্ডবিধিৰ ৩৭৯/৪১১ ধাৰত ৮৫৭/১৮ নম্বৰত এটা গোচৰ ৰুজু কৰি নিশা প্ৰায় ১১ বজাত গ্ৰেপ্তাৰ কৰি আজি বিয়লি ৩ বজাত ন্যায়িক জিম্মালৈ প্ৰেৰণ কৰে।
আনহাতে আৰক্ষীয়ে হাৰুণৰ হাতীগাঁৱৰ ভাড়াঘৰৰ পৰা ৩ টা চুৰি লেপটপ, ২ টা ম’বাইল ফোন, ২৫ খন এছ বি আই এ টি এম কাৰ্ড আৰু ১১০ খন আইডিয়া চিম কাৰ্ড জব্দ কৰে। ১১০ খনকৈ চিমকাৰ্ড জব্দ হোৱাক কেন্দ্ৰ কৰি হাৰুণ চাইবাৰ অপৰাধৰ সৈতে জড়িত থকা বুলি আৰক্ষীয়ে সন্দেহ প্ৰকাশ কৰিছে।
