বৰপেটা জিলা উপায়ুক্তৰ বান শিবিৰ পৰিদৰ্শন
বৰপেটা জিলাৰ উপায়ুক্ত মুনীন্দ্ৰ শৰ্মাই আজি জিলাখনৰ নগাঁও আৰু ভেল্লা অঞ্চলৰ কেইবাটাও আশ্ৰয় শিবিৰ পৰিদৰ্শন কৰি বানত ক্ষতিগ্ৰস্ত লোক সকলৰ অৱস্থাৰ বুজ লয়। তেওঁ নগাঁও শিক্ষা মন্দিৰ উচ্চ মাধ্যমিক বিদ্যালয়, নগাঁও প্ৰাথমিক বিদ্যালয়, নগাঁও সমূহীয়া ভৱন আৰু ভেল্লা উচ্চ মাধ্যমিক বিদ্যালয়ত থকা বানাক্ৰান্ত লোক সকলৰ অভাৱ-অভিযোগৰ বুজ লয়।
শিবিৰবাসী সকলৰ কেইবাটাও সমস্যাৰ তেওঁ তাৎক্ষণিকভাৱে সমাধানৰ ব্যৱস্থাও গ্ৰহণ কৰে। আৱাসী সকলক তেওঁ জনোৱা মতে বানপানীৰ ফলত হোৱা ক্ষয়- ক্ষতিৰ উপযুক্ত ক্ষতিপূৰণৰ ব্যৱস্থা গ্ৰহণ কৰা হৈছে। যিসকলৰ ঘৰ-দুৱাৰ সম্পূৰ্ণ ৰূপে ভাঙি বা উটি গৈছে তেওঁলোকে ১.০৫ লাখ টকা পৰ্যন্ত সাহায্য লাভ কৰিব।
আনকি আংশিকভাৱে ক্ষতি হোৱা ঘৰৰ গৰাকীয়েও বিধি অনুসৰি সাহায্য লাভ কৰিব। তদুপৰি বানপানীত নষ্ট হোৱা বাচন-বৰ্তন আৰু কাপোৰ ক্ৰয় কৰাৰ বাবে শিবিৰত থকা পৰিয়াল সমূহক ৩৮০০ টকাকৈ প্ৰদান কৰা হ’ব বুলি উপায়ুক্ত গৰাকীয়ে জানিবলৈ দিয়ে।
তেওঁ নগাঁও খণ্ড প্ৰাথমিক চিকিৎসালয়ো পৰিদৰ্শন কৰি চিকিৎসকৰ উপস্থিতি আৰু ঔষধৰ উপলদ্ধতাৰ বুজ লয়। চিকিৎসালয়খনত চৰকাৰী বন্ধৰ দিনৰ অজুহাতত ফাৰ্মাচিষ্টৰ অনুপস্থিতিৰ বিষয়টো তেওঁ গুৰুত্ব সহকাৰে লয় আৰু বান পৰিস্থিতিৰ প্ৰতি লক্ষ্য ৰাখি সকলো চিকিৎসালয়ত বন্ধৰ দিনতো চিকিৎসক-কৰ্মচাৰীৰ উপস্থিতি নিশ্চিত কৰাৰ লগতে সাহায্য শিবিৰ সমূহত নিয়মীয়াকৈ ভ্ৰাম্যমাণ চিকিৎসকৰ দলৰ পৰিদৰ্শন নিশ্চিত কৰাৰ বাবে জিলাখনৰ যুটীয়া স্বাস্থ্য সঞ্চালকক নিৰ্দেশ দিয়ে।
উপায়ুক্ত গৰাকীৰ এই পৰিদৰ্শন কালত অসম উদ্যোগিক উন্নয়ন নিগমৰ উপাধ্যক্ষ জিতু তালুকদাৰ, অসম বিত্ত নিগমৰ উপাধ্যক্ষ অনিল দাস, জিলা তথ্য আৰু জনসংযোগ বিষয়া বিকাশ শৰ্মা আৰু চেঙা ৰাজহ চক্ৰৰ বিষয়া ৰাজীৱ দাস আদিয়ে তেওঁক সংগ দিয়ে।