জেফ্ৰি এপষ্টেইন গোচৰৰ নতুন নথিৰ মাজত ড’নাল্ড ট্ৰাম্পৰ বিৰুদ্ধে ধৰ্ষণৰ অভিযোগ, অস্বীকাৰ আমেৰিকাৰ ন্যায় বিভাগৰ

কুখ্যাত যৌন অপৰাধী জেফ্ৰি এপষ্টেইনৰ সৈতে জড়িত কেতবোৰ নতুন নথি-পত্ৰ শেহতীয়াকৈ ৰাজহুৱা কৰা হৈছে। এই নথি-পত্ৰসমূহৰ পৰা এটা চাঞ্চল্যকৰ তথ্য পোহৰলৈ আহিছে যিয়ে আমেৰিকাৰ ৰাজনৈতিক মহলত জোকাৰণি তুলিছে। অভিযোগ অনুসৰি বহু বছৰ পূৰ্বে আমেৰিকাৰ প্ৰাক্তন ৰাষ্ট্ৰপতি ড’নাল্ড ট্ৰাম্পে এগৰাকী মহিলাক ধৰ্ষণ কৰিছিল। অৱশ্যে আমেৰিকাৰ ন্যায় বিভাগে এই গুৰুতৰ অভিযোগ সম্পূৰ্ণৰূপে খণ্ডন কৰিছে। বিভাগটোৰ মতে এনে দাবীৰ কোনো সত্যতা নাই।

ড’নাল্ড ট্ৰাম্পে দীৰ্ঘদিন ধৰি এপষ্টেইনৰ সৈতে থকা তেওঁৰ সম্পৰ্ক লুকুৱাবলৈ চেষ্টা কৰি অহা বুলি চৰ্চা চলিছিল। আনকি শেহতীয়া নথি-পত্ৰত বাৰে বাৰে আন এজন প্ৰাক্তন ৰাষ্ট্ৰপতি বিল ক্লিণ্টনৰ নাম ওলাই থকাৰ সুযোগ লৈ ট্ৰাম্পে নিজকে বচাবলৈ চেষ্টা কৰা বুলি বিৰোধীয়ে অভিযোগ তুলিছে। ইয়াৰ মাজতে ট্ৰাম্পৰ বিৰুদ্ধে ধৰ্ষণৰ দৰে অভিযোগ উত্থাপন হোৱাটোৱে বিষয়টোক অধিক জটিল কৰি তুলিছে। ন্যায় বিভাগে জনাইছে যে ২০২০ চনৰ নিৰ্বাচনৰ পূৰ্বেই এফ বি আইয়ে এনেধৰণৰ অভিযোগ লাভ কৰিছিল যদিও তদন্তত তাৰ কোনো ভিত্তি পোৱা নগ’ল।

প্ৰকাশ পোৱা তথ্য অনুসৰি ফেডাৰেল তদন্তকাৰীসকলৰ ওচৰত জমা হোৱা নথিত এজন লিমুজিন চালকৰ বক্তব্যও অন্তৰ্ভুক্ত আছে। চালকজনৰ দাবী আছিল যে তেওঁ এপষ্টেইন আৰু ট্ৰাম্পৰ মাজত এগৰাকী কিশোৰীক যৌন নিৰ্যাতন চলোৱাৰ বিষয়ে হোৱা কথা-বতৰা শুনিবলৈ পাইছিল। আনকি ধৰ্ষণৰ অভিযোগ অনা মহিলাগৰাকীৰ পাছত ৰহস্যজনকভাৱে মূৰত গুলীৰ আঘাত লাগি মৃত্যু হৈছিল বুলিও নথিত উল্লেখ আছে। অৱশ্যে এই সকলোবোৰ অভিযোগৰ ওপৰত এফ বি আইয়ে কেনেধৰণৰ তদন্ত চলাইছিল সেই বিষয়ে নথিত স্পষ্টকৈ একো কোৱা হোৱা নাই।

আমেৰিকাৰ ন্যায় বিভাগে এই সন্দৰ্ভত এক স্থিতি গ্ৰহণ কৰি কয় যে এই সমগ্ৰ দাবীসমূহ মিছা আৰু ভিত্তিহীন। তেওঁলোকৰ মতে যদি এই অভিযোগৰ সামান্যতমো প্ৰমাণ থাকিলহেঁতেন তেন্তে ইয়াক ইতিমধ্যে ট্ৰাম্পৰ বিৰুদ্ধে আইনগতভাৱে ব্যৱহাৰ কৰা হ’লহেঁতেন। যদিও এপষ্টেইনৰ সৈতে ট্ৰাম্পৰ সামাজিকভাৱে উঠা-বহা আছিল বুলি জনা যায়, তথাপিও এই নতুন নথি-পত্ৰত তেওঁৰ বিৰুদ্ধে কোনো ধৰণৰ অপৰাধমূলক প্ৰমাণ পোৱা হোৱা নাই বুলি বিভাগে স্পষ্ট কৰি দিছে।