ছাত্ৰ-ছাত্ৰীসকলৰ মানসিক আৰু সৃজনশীল বিকাশৰ বাবে আজি পূব কামৰূপ কুইজ ফ’ৰামৰ উদ্যোগত এখন বিশেষ কৰ্মশালা অনুষ্ঠিত হৈ যায়। দিনজোৰা কাৰ্যসূচীৰে আয়োজন কৰা এই গ্ৰীষ্মকালীন কৰ্মশালাত কুইজ, তৰ্ক আৰু কবিতা আবৃত্তিৰ ওপৰত প্ৰশিক্ষণ দিয়া হয়। সদৌ অসম ভিত্তিত অনুষ্ঠিত হোৱা এই কৰ্মশালাত ৰাজ্যৰ বিভিন্ন প্ৰান্তৰ প্ৰায় এশগৰাকী ছাত্ৰ-ছাত্ৰীয়ে বৰ উৎসাহেৰে ভাগ লয়। ইয়াত অভিজ্ঞ ব্যক্তিসকলৰ জৰিয়তে অংশগ্ৰহণকাৰীসকলক কুইজৰ কৌশল, তৰ্ক কৰাৰ নিয়ম আৰু কবিতা আবৃত্তিৰ ধুনীয়া কৌশলসমূহ শিকোৱা হয়।
অনুষ্ঠানটো উদ্বোধন কৰে পূব কামৰূপ মহাবিদ্যালয়ৰ অধ্যাপক আয়েজ আলীয়ে। কৰ্মশালাখনত মুখ্য অতিথি হিচাপে উপস্থিত থাকে কমলপুৰ সমষ্টিৰ বিধায়ক দিগন্ত কলিতা। ছাত্ৰ-ছাত্ৰীসকলক উদ্দেশ্যি তেখেতে কয় যে বৰ্তমানৰ প্ৰতিযোগিতাৰ যুগত কেৱল কিতাপৰ জ্ঞানেৰেই আগবাঢ়িব নোৱাৰি। কুইজে আমাৰ জ্ঞান বঢ়ায়, তৰ্কই যুক্তিৰে চিন্তা কৰিবলৈ শিকায় আৰু কবিতা আবৃত্তিয়ে আমাৰ ভাষা আৰু সংস্কৃতিৰ প্ৰতি মৰম বঢ়ায়। এনেকুৱা কৰ্মশালাই ছাত্ৰ-ছাত্ৰীসকলৰ আত্মবিশ্বাস বঢ়োৱাত আৰু তেওঁলোকৰ ব্যক্তিত্ব গঢ়াত বহুত সহায় কৰিব বুলি তেখেতে মত প্ৰকাশ কৰে। সমাজ গঢ়াৰ ক্ষেত্ৰত ফ’ৰামৰ এই কাম সঁচাকৈয়ে প্ৰশংসনীয় বুলিও তেখেতে উল্লেখ কৰে।
কৰ্মশালাখনত সমল ব্যক্তি হিচাপে ৰাহুল দত্তই কুইজৰ, পৰাগ জ্যোতি ডেকাই কবিতা আবৃত্তিৰ আৰু কিশোৰ কুমাৰ শৰ্মাই তৰ্কৰ বিষয়ে ছাত্ৰ-ছাত্ৰীসকলক সুন্দৰকৈ বুজাই দিয়ে আৰু প্ৰশিক্ষণ দিয়ে। অনুষ্ঠানটোত অধ্যাপিকা কল্পনা ভাগৱতী, অৱসৰপ্ৰাপ্ত শিক্ষক আয়েজৰ ৰহমান, বিশিষ্ট লেখিকা ৰক্তিমা বৰুৱা, নিৰদা ডেকাকে ধৰি কেইবাগৰাকীও বিশিষ্ট ব্যক্তি আৰু ফ’ৰামৰ সকলো সদস্য উপস্থিত থাকে। কৰ্মশালাৰ শেষত কুইজ প্ৰতিযোগিতাত জিকিবলৈ সক্ষম হোৱা প্ৰতিযোগীসকলক পুৰস্কাৰ প্ৰদান কৰা হয়।
