কৰ’না ভাইৰাছ চীনৰ জঘন্য উপহাৰ; পুনৰ আক্ৰমনাত্মক ডোনাল্ড ট্ৰাম্প
গোটেই বিশ্বকে আতংকিত কৰি ৰখা কৰ’না ভাইৰাছ মহামাৰীৰ বাবে পুনৰ চীনক দোষাৰোপ কৰিলে আমেৰিকাৰ ৰাষ্ট্ৰপতি ডোনাল্ড ট্ৰাম্পে।
কৰ’না ভাইৰাছ চীনৰ এক জঘন্য উপহাৰ বুলি মন্তব্য কৰিছে ট্ৰাম্পে।
ইয়াৰ পূৰ্বে আমেৰিকাৰ ৰাষ্ট্ৰপতিগৰাকীয়ে চীনে কৰ’না ভাইৰাছ বিশ্বত বিয়পাই দিয়াৰ অভিযোগ তুলিছিল।
তেওঁ কৰ’না ভাইৰাছ ইয়াৰ উৎস স্থল উহানতে সীমাবদ্ধ কৰি ৰাখিব পৰা গ’লহেঁতেন বুলিও মন্তব্য কৰিছিল।
কৰ’না ভাইৰাছৰ তথ্য বেইজিঙে লুকোৱা বুলি চীনৰ বিৰুদ্ধে অভিযোগ অনাৰ পাছতে দুয়োখন দেশৰ মাজৰ কূটনৈতিক সম্পৰ্কৰ অৱনতি ঘটে।
কিন্তু বৃহস্পতিবাৰে পুনৰ চীনৰ প্ৰতি ট্ৰাম্প আক্ৰমণাত্মক হৈ পৰে। তেওঁ কৰ’নাৰ এই বিশ্বগ্ৰাসী সংক্ৰমণৰ বাবে পোনপটীয়াকৈ চীনক দোষাৰোপ কৰে।
All over the World the CoronaVirus, a very bad “gift” from China, marches on. Not good!
— Donald J. Trump (@realDonaldTrump) May 28, 2020
এটা টুইটত ট্ৰাম্পে লিখিছে,’’কৰ’না ভাইৰাছ চীনৰ এক জঘন্য উপহাৰ। বিশ্বজুৰি ইয়াৰ আতংক অব্যাহত আছে। খুব ভাল নহয়।‘’
আমেৰিকাত ইতিমধ্যে কৰ’নাৰ ফলত মৃত্যুৰ সংখ্যা লাখ অতিক্ৰম কৰিছে।
বৃহস্পতিবাৰে নিশা পৰ্যন্ত বিশ্বত কৰ’না আক্ৰান্তৰ সংখ্যা হৈছেগৈ ৫৮লাখ ৬০হাজাৰ ১৩৩জন।
ইয়াৰ ভিতৰত সক্ৰিয় ৰোগীৰ সংখ্যা ২৯ লাখ ৫৯হাজাৰ ১১০জন আৰু এই সংক্ৰমণৰ পৰা ২৫লাখ ৪০হাজাৰ ৯৭৭জন লোক সুস্থ হৈ উঠিছে।
আনহাতে, ৩লাখ ৬০হাজাৰ ৪৬জন লোকৰ কৰ’নাৰ ফলত মৃত্যু হৈছে।