কেন্দ্ৰীয় গৃহ মন্ত্ৰী অমিত শ্বাহে বৃহস্পতিবাৰে লকডাউন-৪ৰ ওপৰত সকলো ৰাজ্যৰে মুখ্য মন্ত্ৰীসকলৰ সৈতে কথা পাতে।
তেওঁ চলি থকা লকডাউন-৪ সম্পৰ্কত মুখ্য মন্ত্ৰীসকলৰ মতামত গ্ৰহণ কৰে।
গৃহ মন্ত্ৰী শ্বাহে ৩১ মে’ত অন্ত পৰিবলগীয়া লকডাউন-৪ৰ পাছৰ লকডাউন সম্পৰ্কে চিন্তা-চৰ্চা জানিব বিচাৰে।
দেশত ৫.০ লকডাউন ঘোষণা কৰা হ’ব নে নাই তাক লৈ সকলোৰে দৃষ্টি নিবদ্ধ হৈ আছে।
চৰকাৰে লকডাউন ৫.০ৰ সম্পৰ্কে চিন্তা-চৰ্চা অব্যাহত ৰাখিছে।
৩১ মে’ত প্ৰধান মন্ত্ৰী নৰেন্দ্ৰ মোদীয়ে মন কী বাত অনুষ্ঠানত এই সম্পৰ্কে স্পষ্ট কৰিব বুলি অনুমান কৰা হৈছে।
সূত্ৰসমূহৰ মতে, দুসপ্তাহৰ বাবে লকডাউন বৃদ্ধি কৰাটো প্ৰায় নিশ্চিত হৈছে।
চৰকাৰে অধিক শিথিলতা আনি অৰ্থৈনিতক ব্যৱস্থা উন্নত কৰি তোলাৰ চেষ্টা চলোৱা দেখা গৈছে।
সূত্ৰসমূহৰ মতে, লকডাউন ৫.০ত কৰ’না সংক্ৰমণ একেৰাহে বৃদ্ধি পাই থকা ১১খন চহৰত লকডাউনৰ কঠোৰ নিয়ম বলবৎ থাকিব।
গৃহ মন্ত্ৰী অমিত শ্বাহে মুখ্য মন্ত্ৰীসকলৰ সৈতে বৃহস্পতিবাৰে লকডাউন বৃদ্ধিৰ প্ৰসংগত প্ৰথমবাৰৰ বাবে কথা পাতে।
মুখ্য মন্ত্ৰীসকলৰ পৰা তেওঁ নিজ নিজ ৰাজ্যৰ পৰিস্থিতি সম্পৰ্কে অৱগত হোৱাৰ লগতে পৰৱৰ্তী পদক্ষেপ সম্পৰ্কত তেওঁলোকৰ মতামত গ্ৰহণ কৰে।
