শিৱসাগৰ জিলাৰ নতুন উপায়ুক্ত হিচাপে দায়িত্ব গ্ৰহণ ডাঃ এছ লক্ষ্মণনৰ

ভাৰতীয় প্ৰশাসনিক সেৱাৰ বিষয়া ডাঃ এছ লক্ষ্মণনে শিৱসাগৰ জিলাৰ নতুন উপায়ুক্ত হিচাপে কাৰ্য্যভাৰ গ্ৰহণ কৰিয়েই  জিলা প্ৰশাসনৰ জেষ্ঠ বিষয়া সকলৰ লগত এক গুৰুত্বপূৰ্ণ বৈঠকত মিলিত হৈ জিলাখনৰ ৰাষ্ট্ৰীয় নাগৰিকপঞ্জী আৰু আধাৰ সেৱাৰ কাম কাজৰ অগ্ৰগতিৰ বুজ লোৱাৰ লগতে জিলাখনত ৰূপায়ণ হৈ থকা বিভিন্ন আঁচনি আৰু প্ৰকল্পৰ বিষয়ে সংশ্লিষ্ট বিষয়া সকলৰ লগত আলোচনা কৰে। আজি অনুস্থিত  সোনোৱাল কছাৰী আৰু মিচিং স্বায়ত্ত শাসিত পৰিষদৰ নিৰ্বাচন আৰু আগন্তক গণৰাজ্য দিৱস উদযাপনৰ প্ৰস্তুতি সম্পৰ্কেও আলোচনা কৰে ।

নৱনিযুক্ত  উপায়ুক্তগৰাকীয়ে  উপায়ুক্তৰ কাৰ্যালয়ৰ বিভিন্ন শাখা পৰিদৰ্শন কৰাৰ লগতে সংশ্লিষ্ট বিষয়া কৰ্মচাৰী সকলৰ লগত চিনাকি হৈ কাম কাজ সম্পৰ্কে কৰ্মচাৰীসকলৰ লগত মত বিনিময় কৰে।

উল্লেখযোগ্য যে, চিকিৎসা বিজ্ঞানৰ স্নাতক ডঃ সুব্ৰমণি আয়াৰ লক্ষ্মণনে ইয়াৰ পূৰ্বে শদিয়াৰ মহকুমাধিপতি, তিনিচুকীয়া জিলাৰ অতিৰিক্ত উপায়ুক্ত, গুৱাহাটী উন্নয়ন বিভাগৰ উপ সচিব, স্বাস্থ্য বিভাগৰ যুটীয়া সচিব, হোজাইৰ উপায়ুক্ত আৰু শেহতীয়াকৈ কাছাৰৰ উপায়ুক্ত হিচাপে কাৰ্যনিৰ্বাহ কৰিছিল।