মদ্যপান কৰা চালকে গাড়ীৰে খুন্দিয়ালে বাইকত! শ্মশানলৈ যোৱাৰ পথত বৃদ্ধৰ মৃত্যু
তীব্ৰ বেগেৰে গৈ এখন গাড়ীয়ে খুন্দা মাৰিলে বাইকত। অভিযোগ অনুসৰি গাড়ীৰ চালকজন মদ্যপান কৰি আছিল। স্কুটিৰ খুন্দাত স্কুটিৰ পৰা বাগৰি পৰে বৃদ্ধ আৰোহী দুজন। থিতাতে মৃত্যু হয় এজন লোকৰ। আহত দ্বিতীয়জন ব্যক্তিক চিকিৎসালয়ত ভৰ্তি কৰোৱা হয়। অভিযুক্তৰ নাম হিমাংশু। চালকজনক বিচাৰি আৰক্ষীয়ে অভিযান অব্যাহত ৰাখিছে। দিল্লীৰ ময়ুৰ বিহাৰ অঞ্চলৰ ট্ৰেফিক চিগনেলত সংঘটিত হৈছে এই ঘটনা।
আৰক্ষীৰ সূত্ৰ অনুসৰি হিমাংশু চিলা গাঁৱৰ বাসিন্দা। মদ্যপান কৰি তীব্ৰ বেগত গাড়ী চলাইছিল বুলি অভিযোগ উঠিছে। সেই সময়ত ট্ৰেফিক চিগনেলত ৰখাই থোৱা আছিল স্কুটিখন। শ্যাম চান্দ আৰু সুৰজামাল বাৰ্মা নামৰ দুজন বৃদ্ধ তাত উঠি আছিল।তেঁওলোক চিলা শ্মশানলৈ গৈ চিনাকী এজনৰ অন্ত্যেষ্টিক্ৰিয়াত অংশগ্ৰহণ কৰিবলৈ গৈছিল। হিমাংশুৰ গাড়ীখনে পিছফালৰ পৰা আহি স্কুটিখনত খুন্দা মাৰে। দুৰ্ঘটনাৰ ফলত দুচকীয়া বাহনৰ পৰা পৰি শ্যামে থিতাতে মৃত্যুক সাৱটি লয়। আঘাতপ্ৰাপ্ত হৈ সুৰজমলক চিকিৎসালয়ত ভৰ্তি কৰোৱা হয়।
প্ৰত্যক্ষদৰ্শীয়ে দাবী কৰিছে যে স্কুটাৰত খুন্দা মৰাৰ পাছত চালকে গাড়ীখনৰ গতি আৰু অধিক তীব্ৰতৰ কৰি তুলিছিল। ফলত আন এখন বাহনৰ সৈতে সংঘৰ্ষ হয়। আৰক্ষীয়ে অঞ্চলটোৰ চিচিটিভি ফুটেজ পৰীক্ষা কৰি আছে।