“প্ৰয়োজন সাপেক্ষে আমি হোজাইৰ বিধায়ক শিলাদিত্যক ত্ৰিপুৰা নাইবা বাংলাদেশত থৈ আহিবলৈ বদ্ধপৰিকৰ।” আজি দুৰ্নীতি বিৰোধী যুৱশক্তি অসমে শিলাদিত্যই কালি দিচপুৰ প্ৰেছক্লাবৰ মুখামুখি অনুষ্ঠানত কৰা মন্তব্যৰ প্ৰতিক্ৰিয়া প্ৰকাশ কৰি এইদৰে কয়।
উল্লেখ্য যে, কালিৰ দিচপুৰ প্ৰেছক্লাবৰ মুখামুখি অনুষ্ঠানত হোজাই সমষ্টিৰ বিতৰ্কৰ ৰজা হিচাপে খ্যাত বিধায়ক শিলাদিত্যই অসমখনক ত্ৰিপুৰা হিচাপে গঢ় দিয়াৰ পোষকতা কৰিছিল।
আনহাতে, আজি গুৱাহাটী প্ৰছক্লাবত দিয়া এখন সংবাদমেলত দুৰ্নীতি বিৰোধী যুৱশক্তি অসমে তেওঁক উভতি ধৰে। দুৰ্নীতি বিৰোধী যুৱ শক্তি, অসমৰ সভাপতি ধৰ্মকান্ত গগৈয়ে হোজাই বিধায়কগৰাকীক ছাগলীৰ সৈতে তুলনা কৰি কয় “অতি মুৰ্খ বিধায়ক শিলাদিত্যই যদি এনে ধৰণৰ মন্তব্য কৰি থাকে তেন্তে তেওঁক আমি ত্ৰিপুৰা নাইবা বাংলাদেশত থৈ আহিম, এই কথা অতি স্পষ্ট।”
তেওঁ লগতে বিধায়কগৰাকীক সকীয়নি প্ৰদান কৰি কয় “অসমৰ যুৱ প্ৰজন্মক ছাগল আৰু পাগলৰ দৰে মাতলামি কৰি বিপথে পৰিচালিত কৰি নাথাকিব।”
আনহাতে, ভাৰতবৰ্ষক এখন ধৰ্ম নিৰপেক্ষ ৰাষ্ট্ৰ বুলি উল্লেখ কৰি তেওঁ লগতে কয় “এই ৰাষ্ট্ৰত যদি কোনোবাই গণতান্ত্ৰিক পদ্ধতিৰে হিন্দু বা মুছলিম যিয়েই নহওক, মুখ্য মন্ত্ৰী হয়, তাত শিলাদিত্য দেৱৰ কি অসুবিধা আছে?”
তেওঁ লগতে কয় যে এইখন ৰাষ্ট্ৰত সংবিধানে সকলোকে সমান অধিকাৰ দিছে। এনে পৰিপ্ৰেক্ষিতত শিলাদিত্য দেব কোন বুলিও উক্ত সংবাদমেলত প্ৰশ্ন কৰে।
তেওঁ লগতে শিলাদিত্যক অনুৰোধ কৰি কয় “আপুনি এগৰাকী হিন্দু বীৰ অথবা হিন্দুত্ববাদী নেতা হ’লেও আপোনাৰ বাংলাদেশৰ পৰা অনা চাৰ্টিফিকেটখিনি সঠিকভাৱে ৰাখক।”
আনহাতে, এন আৰ চিক লৈ উদ্ভট মন্তব্য নকৰিবলৈ বাৰম্বাৰ অনুৰোধ জনাই থকা আৰক্ষী সঞ্চালক প্ৰধান কুলধৰ শইকীয়াৰ এইক্ষেত্ৰত স্থিতিৰ প্ৰতি প্ৰশ্ন তোলে সংগঠনটোৰ সভাপতিগৰাকীয়ে।
তেওঁ কয় “শিলাদিত্যই ইমান মুকলিভাৱে এন আৰ চিৰ বিৰুদ্ধে মন্তব্য দি অহাৰ পিছতো তেওঁক এতিয়াও মুকলিকৈ ৰখা হৈছে কিয়?”
তদুপৰি উক্ত সংবাদমেলৰ জৰিয়তে তেওঁ মুখ্য মন্ত্ৰী সৰ্বানন্দ সোণোৱালক তেওঁৰ দলৰে বিধায়ক শিলাদিত্যৰ বিৰুদ্ধে বিহিত ব্যৱস্থা ল’বৰ বাবে আহ্বান জনায়।
