তৃতীয় আৰু চতুৰ্থ বৰ্গৰ নিযুক্তিত ৰৈ যোৱা আসোঁৱাহ দূৰ কৰাৰ দাবীত ৰাজ্যপালক সাক্ষাৎ ডি ৱাই এফ আই
অসম চৰকাৰে অনুষ্ঠিত কৰা তৃতীয় আৰু চতুৰ্থ বৰ্গৰ ৪১,৭০৩ টা খালী পদৰ নিযুক্তি প্ৰক্ৰিয়াত ৰৈ যোৱা আসোঁৱাহ দূৰ কৰাৰ লগতে নিযুক্তি প্ৰক্ৰিয়াত হোৱা অনিয়মৰ তদন্ত বিচাৰি আজি অসমৰ ৰাজ্যপালক সাক্ষাত কৰিলে ভাৰতৰ যুৱ ফেডাৰেছন (ডি ৱাই এফ আই) ৰ অসম ৰাজ্যিক কমিটিয়ে।
ডি ৱাই এফ আইৰ ৰাজ্যিক সম্পাদক ৰিতু ৰঞ্জন দাস, যুটীয়া সম্পাদক নিৰংকুশ নাথ, দুই নিযুক্তি বঞ্চিত প্ৰাৰ্থী প্ৰাণজ্যোতি নাথ আৰু পাৰ্থপ্ৰতীম বৰ্মনে ৰাজ্যপাল গোলাপ চান্দ কাটাৰিয়াক সাক্ষাৎ কৰি স্মাৰক পত্ৰ প্ৰদান কৰাৰ লগতে নিযুক্তি প্ৰক্ৰিয়াৰ আসোঁৱাহ সম্পৰ্কত আলোচনা কৰে।
এক দীঘলীয়া প্ৰক্ৰিয়াৰ অন্তন্ত যোৱা ২৫ জুন তাৰিখে ৪১,৭০৩ টা খালী পদৰ বিপৰীতে নিযুক্তি পত্ৰ প্ৰদান কৰে। কিন্তু এই প্ৰক্ৰিয়াত অভাৰলেপিং হৈ প্ৰায় আধা সংখ্যক পদেই পূৰণ নহ’ল। ফলত বহু যুৱক-যুৱতী চাকৰি লাভৰ পৰা বঞ্চিত হয়। তাৎপৰ্যপূৰ্ণ কথা হ’ল চৰকাৰে আজিলৈ কিমান সংখ্যক প্ৰাৰ্থীয়ে চাকৰিত যোগদান কৰিলে আৰু কিমান সংখ্যক পদ খালী হৈ ৰ’ল তাৰ সবিশেষ তথ্য প্ৰকাশ নকৰিলে।
ইয়াৰ উপৰি চতুৰ্থ বৰ্গৰ পদৰ বাবে সৰ্বোচ্চ শিক্ষাগত যোগ্যতা আছিল উচ্চতৰ মাধ্যমিক উত্তীৰ্ণ। কিন্তু এতিয়া পোহৰলৈ আহিছে যে বৃহৎ সংখ্যক উচ্চ শিক্ষিত প্ৰাৰ্থীয়ে কম অৰ্হতা দেখুৱাই নিযুক্তি লাভ কৰিবলৈ সক্ষম হৈছে। আশ্চৰ্যকৰ কথা হৈছে চতুৰ্থ বৰ্গৰ পদত এম এ, এম এচ চি আৰু এম কম ডিগ্ৰীধাৰী প্ৰাৰ্থীয়ে আৱেদন কৰি চাকৰি ল’বলৈ সক্ষম হৈছে। ইয়াৰ ফলত চতুৰ্থ বৰ্গৰ পদৰ প্ৰকৃত যোগ্যতাধাৰী প্ৰাৰ্থীসকল বঞ্চনাৰ বলি হ’বলগীয়া হৈছে।
অসম চৰকাৰৰ নিযুক্তি প্ৰক্ৰিয়াৰ আন এক চিন্তনীয় দিশ হৈছে, চৰকাৰে আজিলৈ প্ৰাৰ্থীসকল নাম তালিক আৰু প্ৰাপ্ত নম্বৰ প্ৰকাশ নকৰিলে। স্বচ্চ আৰু নিকা নিযুক্তিৰ কথা কোৱা চৰকাৰখন নিযুক্তিৰ নামত যে অস্বচ্চ পদ্ধতি অবলম্বন কৰিছে সেয়া এই ঘটনাই প্ৰমাণ কৰিছে। ইয়াৰ মাজেৰে স্বজন তোষণৰ আশ্ৰয় লোৱাৰ অভিযোগ উত্থাপিত হৈছে।
এই সমগ্ৰ অনিয়মৰ তদন্ত কৰা আৰু ৰৈ যোৱা আসোঁৱাহ দূৰ কৰাৰ বাবে চৰকাৰক হেঁচা দিবলৈ ৰাজ্যপালক সাক্ষাৎ কৰা হয়। ৰাজ্যপাল শ্ৰদ্ধাৰ গোলাপ চান্দ কাটাৰিয়াই প্ৰতিনিধি দলটোৰ লগত মনযোগেৰে আলোচনা কৰি অভিযোগসমূহৰ বিষয়ে বুজ লয় আৰু আজিয়ে মুখ্যমন্ত্ৰী আৰু নিযুক্তি বৰ্ডলৈ পত্ৰ প্ৰেৰণ কৰিব বুলি আশ্বাস দিয়ে।