১৭ হাজাৰ কোটি টকাৰ বেংক ঋণ জালিয়াতিৰ গোচৰত ইডিয়ে অনিল আম্বানীক চমন কৰিছে। শুকুৰবাৰে পুৱা ৭ বজাত ৰিলায়েন্স গ্ৰুপৰ অধ্যক্ষ আৰু পৰিচালন সঞ্চালকলৈ এখন জাননী প্ৰেৰণ কৰা হয়। তেওঁক তদন্তকাৰীয়ে সোধা-পোছা কৰিব। ৫ আগষ্টত ইডিৰ মুখ্য কাৰ্যালয়ত হাজিৰ হ’বলৈ কোৱা হৈছে অনিল আম্বানীক।
ঋণ জালিয়াতিৰ গোচৰত ধন সৰবৰাহ প্ৰতিৰোধ আইনৰ অধীনত তদন্ত আৰম্ভ কৰিছে ইডিয়ে। যোৱা সপ্তাহত তদন্তকাৰীয়ে অনিল আম্বানীৰ ৰিলায়েন্স গ্ৰুপৰ ৫০টা কোম্পানীত তালাচী চলাইছিল। এই অভিযানৰ সময়ত কমেও ২৫ জন লোকক সোধা-পোছা কৰা হয়।
ছেবিয়ে অভিযোগ কৰে যে অনিলৰ ৰিলায়েন্স ইনফ্ৰাষ্ট্ৰাকচাৰে চি এল ই প্ৰাইভেট লিমিটেডৰ জৰিয়তে প্ৰায় ১০ হাজাৰ কোটি টকা ডাইভাৰ্ট কৰিছিল। ছেবিৰ মতে চি এল ই আচলতে ৰিলায়েন্স ইনফ্ৰা গ্ৰুপৰ এটা কোম্পানী। কিন্তু ইয়াক সম্পৰ্কীয় পক্ষ (ৰিলেটেড পাৰ্টি) হিচাপে ঘোষণা কৰা হোৱা নাই।
ইকনমিক টাইমছত প্ৰকাশিত এক প্ৰতিবেদন অনুসৰি ৰিলায়েন্স গ্ৰুপৰ ঘনিষ্ঠ সূত্ৰই দাবী কৰিছে যে প্ৰকৃত ঋণৰ পৰিমাণ ৬৫০০ কোটি টকাতকৈ বেছি নহয়।
ছেবিয়ে দাবী কৰিছে যে ২০১৭ বিত্তীয় বৰ্ষৰ পৰা ২০২১ বিত্তীয় বৰ্ষলৈ ৰিলায়েন্স ইনফ্ৰাই প্ৰায় ১০,১১০ কোটি টকা ৰাইট অফ কৰিছে। ইয়াৰ ভিতৰত আছে প্ৰভিশন, ইম্পেয়াৰমেন্ট আৰু ফেয়াৰ ভেল্যু এডজাষ্টমেন্ট।
ছেবিয়ে লগতে দাবী কৰে যে ২০২২ চনৰ ৩১ মাৰ্চলৈকে আৰ ইনফ্ৰা আৰু চিএলইৰ মাজত মুঠ ৮,৩০২ কোটি টকাৰ লেনদেন হৈছিল। ইয়াৰ ভিতৰত আইচিডি, ইকুইটি বিনিয়োগ আৰু গেৰান্টি অন্তৰ্ভুক্ত। ইডিয়ে ২০১৬ বিত্তীয় বৰ্ষৰ পৰা ২০২৩ বিত্তীয় বৰ্ষৰ ভিতৰত কৰা সকলো লেনদেনৰ তদন্ত কৰি আছে।
