কাজিৰঙা ৰাষ্ট্ৰীয় উদ্যানৰ লগত সংযোজিত অষ্টমটো বনাঞ্চল আজি আনুষ্ঠানিকভাৱে ঘোষণা কৰা হয় ৷ ইয়াৰ লগে লগে কাজিৰঙাৰ অষ্টমটো ৰেঞ্জ বা বনাঞ্চলৰ কাম আনুষ্ঠানিকভাৱে আৰম্ভ হয় ৷
কাজিৰঙাৰ সঞ্চালকৰ কাৰ্যালয় চৌহদতে থকা খণ্ড বন বিষয়াৰ কাৰ্যালয় প্ৰংগনত আয়োজিত এক বিশেষ অনুষ্ঠানত প্ৰৱেশ পথৰ ফটা আৰু ফলক উন্মোচন কৰি আনুষ্ঠানিকভাৱে উদ্বোধন কৰে কাজিৰঙাৰ সঞ্চালক পি শিৱকুমাৰ আৰু পূব অসম বন্যপ্ৰাণী সংমণ্ডলৰ ডি এফ অ’ ৰোহিনী বল্লভ শইকীয়াই ৷
অনুষ্ঠানত অসম ৰাজ্যিক সাংবাদিক সন্থাৰ সভাপতি জিতু শৰ্মা ৰাজখোৱা, বোকাখাত প্ৰেছ ক্লাবৰ সভাপতি ভৱানন্দ কলিতা,ইমজাৰ সকলো সদস্য আৰু বন বিষয়াসকল উপস্থিত থাকে ৷
১৯০ বৰ্গ কিলোমিটাৰ পৰিসৰৰ এই বনাঞ্চলটো কাজিৰঙাৰ অষ্টম ৰেঞ্জ হিচাপে ধৰা হৈছে ৷ ২০১৮ চনৰ এক নিৰ্দেশনাৰে ঘোষণা কৰা এই বনাঞ্চলটোৰ বাবে দিপাঙ্কৰ দেবক ভাৰপ্ৰাপ্ত বনাঞ্চলিক বিষয়া হিচাপে আজি দায়ীত্ব অৰ্পণ কৰা হয় ৷
নৱ গঠিত এই বনাঞ্চলটোয়ে পূব অসম বন্যপ্ৰাণী সংমণ্ডলৰ বোকাখাত খণ্ড বন কাৰ্যালয়ৰ পৰিসৰৰ উপৰিও কাজিৰঙাৰ ষষ্ঠ সংযোজনৰ কিছু অঞ্চলো সামৰি ল’ব৷
সম্প্ৰতি বোকাখাত বন খণ্ডৰ অধীনৰ ভক্তে চাপৰি,গাভৰু চাপৰি,মৰিয়াহোলা, মদাৰজুৰি,পানবাৰী, শিশুবাৰী বনশিৱিৰৰ লগতে গঙ্গা চিলনী নামৰ ভ্ৰাম্যমাণ বন শিৱিৰক বোকাখাত বনাঞ্চলৰ অন্তৰ্ভূক্ত কৰা হৈছে ৷
