দুস্কৃতিকাৰীৰ সৈতে সংঘটিত এক সংৰ্ঘষত উত্তৰ প্ৰদেশৰ কানপুৰত ৮গৰাকী আৰক্ষীৰ লোক নিহত হৈছে।
বৃহস্পতিবাৰে মাজনিশা সংঘটিত হয় এই ভয়ংকৰ ঘটনা।
বাতৰি অনুসৰি, নিশা প্ৰায় ১ বজাত ৰাজ্যখনৰ কানপুৰৰ চৌবেপুৰত কুখ্যাত অপৰাধী বিকাশ ডুবেক কৰায়ত্ত কৰিবলৈ আৰক্ষী উপস্থিত হয়।
অপৰাধীক ধৰাৰ বাবে অপেক্ষা কৰি থকা আৰক্ষীৰ দলটোৰ ওপৰত হঠাতে এটা ঘৰৰ ছাদৰ পৰা ধাৰাসাৰ গুলীবৰ্ষণ চলে। আৰক্ষীৰ লোকসকলেও প্ৰত্যুত্তৰত গুলীবৰ্ষণ কৰে।
কিন্তু দুস্কৃতিকাৰীসকলৰ অতৰ্কিত আক্ৰমণত গুলীবিদ্ধ হৈ ঘটনাস্থলীতে ৮গৰাকীকৈ আৰক্ষীৰ লোক নিহত হয়। ইয়াৰ ভিতৰত কানপুৰৰ উপ আৰক্ষী অধীক্ষক দেবেন্দ্ৰ মিশ্ৰও আছে।
এই সংঘৰ্ষত আন ছয়গৰাকী আৰক্ষীৰ লোক আহত হয় আৰু ইয়াৰে এগৰাকীৰ অৱস্থা সংকটজনক বুলি কোৱা হয়।
আৰক্ষীৰ সূত্ৰৰ মতে, অভিযুক্ত বিকাশ ডুবেৰ বিৰুদ্ধে থানাত প্ৰৱেশ কৰি ৰাজ্যখনৰ মন্ত্ৰীক হত্যা কৰাৰ অভিযোগ আছে।
অতি সন্তৰ্পনে চলোৱা আৰক্ষীৰ এই অভিযানৰ খৱৰ গোপনে দুস্কৃতিকাৰীসকলে লাভ কৰিছিল বুলি অনুমান কৰা হৈছে।
সেয়েহে, পূৰ্বৰে পৰাই খাপ পিতি থাকি আৰক্ষীলৈ অতৰ্কিত গুলীচালনা কৰিবলৈ সক্ষম হয়।
ঘটনা সংঘটিত হোৱাৰ পাছতে ঘটনাস্থলীত আৰক্ষীৰ বিশাল বাহিনী মোতায়েন কৰা হয় আৰু অভিযুক্ত বিকাশ ডুবে তথা তেওঁৰ সংগীসকলক গ্ৰেপ্তাৰ কৰাৰ বাবে ব্যাপক অভিযান আৰম্ভ কৰা হৈছে।
ইপিনে, শুকুৰবাৰে পুৱাই উত্তৰ প্ৰদেশ আৰক্ষীৰ আইন-শৃংখলা শাখাৰ অতিৰিক্ত আৰক্ষী অধীক্ষক প্ৰশান্ত কুমাৰ উপস্থিত হৈ ঘটনাৰ বুজ লয়।
আনহাতে, ৰাজ্যখনৰ গৃহ বিভাগে অপৰাধীৰ বিৰুদ্ধে কঠোৰ ব্যৱস্থা গ্ৰহণৰ নিৰ্দেশ দিছে।
