শিৱসাগৰৰ কোঁৱৰপুৰত অঘটন: দলঙৰ পৰা জঁপিয়াই আত্মহত্যাৰ চেষ্টা বৃদ্ধাৰ
শিৱসাগৰ জিলাৰ কোঁৱৰপুৰ অঞ্চলত কিছু সময় পূৰ্বে সংঘটিত হৈছে এক চাঞ্চল্যকৰ ঘটনা। অঞ্চলটোৰ মাজেৰে পাৰ হৈ যোৱা দিখৌ নদীৰ ওপৰত থকা জয়া দলঙৰ ওপৰৰ পৰা জঁপিয়াই আত্মহত্যাৰ চেষ্টা চলায় এগৰাকী বৃদ্ধাই।
প্ৰায় ৬০-৬৫ বছৰীয়া বৃদ্ধা গৰাকীয়ে দলঙৰ পৰা জাঁপ দিয়াৰ সময়ত নদীৰ পাৰত বাঁহ কাটি থকা স্থানীয় দুগৰাকী লোকে শব্দ শুনি নদীৰ কাষ চাপি আহে।
বৃদ্ধাগৰাকী প্ৰায় ৭০ মিটাৰ মান নদীত উটি যোৱাৰ পিছত দুয়ো ব্যক্তিয়ে নদীত জাঁপ দি বৃদ্ধাগৰাকীক পাৰলৈ উঠাই নিয়ে। স্থানীয় লোকৰ তৎপৰতাত অৱশ্যে বৰ্তমান বৃদ্ধাগৰাকী সংকটমুক্ত বুলি জানিব পৰা গৈছে।
স্থানীয় এগৰাকী ব্যক্তিয়ে জানিবলৈ দিয়া মতে, বৃদ্ধাগৰাকীয়ে নদীত জাঁপ দিয়াৰ পূৰ্বে দলঙৰ ফুটপাথত কিছু সময় ধৰি পায়চাৰি কৰি আছিল। কিন্তু ব্যক্তিগৰাকী সেই স্থানৰ পৰা আঁতৰি অহাৰ পিছতে নদীত জাঁপ দিয়ে বৃদ্ধাগৰাকীয়ে।
অৱশ্যে এইপৰ্যন্ত বৃদ্ধাগৰাকীৰ পৰিচয় লাভ কৰিব পৰা নাই স্থানীয় লোকে। ইতিমধ্যে ঘটনাস্থলীত থকা লোকসকলে এই বিষয়ে আৰক্ষীক অৱগত কৰাৰ লগতে এম্বুলেন্স সেৱাৰ জৰিয়তে বৃদ্ধাগৰাকীক চিকিৎসালয়লৈ প্ৰেৰণ কৰিছে।
উল্লেখ্য যে, বিগত কিছুদিন ধৰি শিৱসাগৰৰত দিখৌ নদীৰ ওপৰত থকা পুৰণি দিখৌ দলঙৰ পৰা জঁপিয়াই আত্মহত্যা কৰাৰ ঘটনাই উদ্বেগৰ সৃষ্টি কৰিছিল।
অৱশ্যে শেহতীয়াকৈ জিলা প্ৰশাসনে এনে ঘটনাৰ পৰিপ্ৰেক্ষিতত দলঙৰ কাষত বেৰা দিয়াৰ পাছত এইধৰণৰ ঘটনা ৰোধ পাইছে।