মাজুলীত ৰাজনৈতিক দলৰে বৈঠকত বহিল নিৰ্বাচনী পৰ্যবেক্ষক লালচান্দ
লখিমপুৰ সংসদীয় সমষ্টিৰ অন্তৰ্গত উত্তৰপৰীয়া ছটা বিধানসভা সমষ্টিৰ বাবে ভাৰতৰ নিৰ্বাচন আয়োগে দায়িত্ব দিয়া সাধাৰণ পৰ্যবেক্ষক সূৰ্যমণি লালচান্দে শুকুৰবাৰে মাজুলীত বিভিন্ন ৰাজনৈতিক দলৰ প্ৰতিনিধিৰ সৈতে বৈঠকত মিলিত হয়।
বৃহস্পতিবাৰে সন্ধিয়াৰ ভাগতে মাজুলীত আহি উপস্থিত হোৱা নিৰ্বাচন পৰ্যবেক্ষকগৰাকীয়ে গড়মূৰত থকা আৱৰ্ত ভৱত নিশাটো বাহৰ পাতি শুকুৰবাৰে পুৱা আৱৰ্ত ভৱনতে কংগ্ৰেছ, বিজেপি আৰু অগপ দলৰ প্ৰতিনিধিৰে আলোচনাত মিলিত হৈ অহা ১১ এপ্ৰিলত হ’ব লগা ভোটগ্ৰহণ প্ৰক্ৰিয়া সন্দৰ্ভত দলসমূহৰ কোনো আশংকা আছে নেকি, সেই বিষয়ে অকলে বুজ লয়।
মাজুলী জিলাতো সম্পূৰ্ণ মুক্ত আৰু নিকা বাতাবৰণৰ মাজত এইবাৰৰ নিৰ্বাচন সম্পন্ন কৰিবলৈ ইতিমধ্যে নিৰ্বাচন আয়োগৰ হৈ তেওঁ নিজে সকলো দিশতে চোকা নজৰ ৰখা বুলি আশ্বস্ত কৰি পৰ্যবেক্ষক লালচান্দে এইক্ষেত্ৰত কোনোধৰণৰ বিসংগতি পৰিলক্ষিত হ’লে পোনপটীয়াকৈ তেওঁক অৱগত কৰিবলৈ ৰাজনৈতিক দলৰ প্ৰতিনিধি সকলক আহ্বান জনায়।
সাধাৰণ পৰ্যবেক্ষকগৰাকীয়ে পুৱাৰ ভাগতে কমলাবাৰী ঘাটলৈ গৈ অহা ৯ এপ্ৰিলত আঁহতগুৰি আৰু দক্ষিণ আঁহতগুৰিৰ দুৰ্গম ভোটকেন্দ্ৰসমূহলৈ ভোটগ্ৰহণৰ বাবে যাব লগা প্ৰিজাইডিং-পোলিং বিষয়াসহ ভোটগ্ৰহণকাৰী দলৰ বাবে সাজু কৰা যাতায়তী ব্যৱস্থাৰো আভাস লয়।
ইয়াৰ পাছতে তেওঁ ১নং কমলাবাৰী প্ৰাথমিক বিদ্যালয়ত সোমাই তাত থকা মাজুলীৰ ৪৯নং ভোটকেন্দ্ৰটো পৰিদৰ্শন কৰে। ভোটকেন্দ্ৰটোত ভোটাৰৰ বাবে থাকিব লগা ন্যূনতম সা-সুবিধাৰাজি নিৰীক্ষণ কৰাৰ লগতে কেন্দ্ৰটোৰ দায়িত্বত থকা ছেক্টৰ বিষয়া আৰু বিদ্যালয় প্ৰধানৰ সৈতে পৰ্যবেক্ষক লালচান্দে মত বিনিময় কৰে।
ইয়াৰ পাছতে তেওঁ গড়মূৰলৈ ঘূৰি আহি উপায়ুক্তৰ কাৰ্যালয়ত স্থাপন কৰা বিভিন্ন নিৰ্বাচনী কোষৰ কোঠা পৰিদৰ্শন কৰাৰ লগতে উপায়ুক্ত তথা জিলা নিৰ্বাচন বিষয়া দেৱপ্ৰসাদ মিশ্ৰ, অতিৰিক্ত উপায়ুক্ত (নিৰ্বাচন) চিন্ময় নাথ, নিৰ্বাচন বিষয়া মগেন নৰহ আৰু একাধিক নিৰ্বাচন কোষৰ তত্বাৱধায়কৰ পৰা নিৰ্বাচনী প্ৰস্তুতিৰ বিষয়ে বুজ লয়।
পৰ্যবেক্ষক লালচান্দে আদৰ্শ আচৰণবিধি সম্পৰ্কীয় অভিযোগ অনলাইনযোগে তাৎক্ষণিকভাৱে নিষ্পত্তিৰ বাবে নিৰ্বাচন আয়োগে এইবাৰৰ পৰা প্ৰৱৰ্তন কৰা ‘চি-ভিজিল’ৰ দায়িত্বত থকা নিৰ্বাচন কোষৰো কামকাজ পৰিদৰ্শন কৰে। ইফালে, পৰ্যবেক্ষক গৰাকীয়ে যোৱা নিশা উপায়ুক্ত কাৰ্যালয়ৰ সভাকক্ষত চলি থকা ইভিএম-ভিভিপেটৰ কমিছনিং প্ৰক্ৰিয়া নিৰীক্ষণ কৰে।
পৰিদৰ্শনকালত মাজুলীৰ উপায়ুক্ত তথা জিলা নিৰ্বাচন বিষয়া মিশ্ৰই পৰ্যবেক্ষকগৰাকীক সংগ দিয়ে। বৃহস্পতিবাৰে সন্ধিয়া ৫.৩০ বজাত মাজুলীত আহি উপস্থিত হোৱা সাধাৰণ পৰ্যবেক্ষক লালচান্দে উপায়ুক্ত কাৰ্যালয়ৰ সভাকক্ষত চলি থকা দ্বিতীয় দিনাৰ ইভিএম-ভিভিপেট কমিছনিঙৰ বিভিন্ন দিশ পৰ্যবেক্ষণ কৰে।
ইপিনে, লখিমপুৰ সংসদীয় সমষ্টিত শান্তিপূৰ্ণ আৰু ভয়-ভীতি মুক্ত বাতাবৰণৰ মাজত ভোটগ্ৰহণ প্ৰক্ৰিয়া সম্পন্ন হোৱাটো নিশ্চিত কৰিবলৈ নিৰ্বাচন আয়োগে আৰক্ষী পৰ্যবেক্ষক হিচাপে নিযুক্তি দিয়া উত্তৰাখণ্ডৰ জ্যেষ্ঠ আই পি এছ বিষয়া কেৱল খুৰানাও যোৱা নিশা মাজুলীত আহি উপস্থিত হয়।
তিনিচুকীয়াৰ পৰা আহি বৃহস্পতি বাৰে নিশাই জিলা সদৰ গড়মূৰত পদাৰ্পন কৰিয়েই তেওঁ মাজুলীৰ উপায়ুক্ত তথা জিলা নিৰ্বাচন বিষয়া দেৱপ্ৰসাদ মিশ্ৰ আৰু আৰক্ষী অধীক্ষক হিতেশ চন্দ্ৰ ৰায়ৰ সৈতে অহা ১১ এপ্ৰিলৰ ভোটগ্ৰহণ প্ৰক্ৰিয়া সম্পূৰ্ণ শান্তিপূৰ্ণ ভাৱে সম্পন্ন কৰিবলৈ জিলা প্ৰশাসন আৰু আৰক্ষী বিভাগে যুগুতোৱা পৰিকল্পনা আৰু আগতীয়া কাৰ্যব্যৱস্থাৰ বিষয়ে আলোচনা কৰে।
আৰক্ষী পৰ্যবেক্ষক খুৰানাই মাজুলীৰ আৰক্ষী অধীক্ষকৰ কাৰ্যালয়ত জিলাখনৰ আৰক্ষী বিষয়াসকলৰ সৈতেও বৈঠক অনুষ্ঠিত কৰি মাজুলীৰ প্ৰতিটো চুক-কোণ সামৰি ভোটাৰ ৰাইজ নিৰাপত্তাক লৈ সম্পূৰ্ণ আশ্বস্ত হ’ব পৰা বাতাবৰণ সুনিশ্চিত কৰিবলৈ আৰক্ষী অধীক্ষকসহ সকলো বিষয়াকে নিৰ্দেশ দিয়ে।