গোলাঘাট জিলাৰ আৱৰ্ত ভৱনৰ সভাকক্ষত শনিবাৰে গোলাঘাট নিৰ্বাচন জিলাৰ পৰ্যবেক্ষক ৰামকৃষ্ণ চাহুৰ অধ্যক্ষতাত ৯৫ নংগোলাঘাট আৰু ৯৬নংখুমটাই সমষ্টিৰ বিভিন্ন ৰাজনৈতিক দল তথা নিৰ্দলীয় প্ৰাৰ্থী আৰু প্ৰতিনিধিৰ মাজত এখন গুৰুত্বপূৰ্ণ বৈঠক অনুস্থিত হয়।
বৈঠকত পৰ্যবেক্ষকগৰাকীয়ে ৰাজনৈতিক দল তথা নিৰ্দলীয় প্ৰাৰ্থীসকলৰ বিভিন্ন অভাৱ-অভিযোগৰ বুজ লোৱাৰ লগতে নিৰ্বাচনী আৰ্হি আচৰণ বিধি পালনৰ ক্ষেত্ৰত সতৰ্ক হ’বলৈ আহ্বান জনায়।
তেওঁ নিৰ্বাচনী ব্যয়ৰ ক্ষেত্ৰত ভাৰতীয় নিৰ্বাচন আয়োগে নিৰ্ধাৰণ কৰি দিয়া নীতি-নিৰ্দেশনাসমূহ পালন কৰিবলৈ পৰামৰ্শ আগবঢ়ায়।
বৈঠকত অংশ লৈ অতিৰিক্ত উপায়ুক্ত কুলদ্বীপ হাজৰিকাই আৰ্হি আচৰণ বিধি সম্পৰ্কীয় বিভিন্ন দিশসমূহ বিতংভাৱে অৱগত কৰায়।
তেওঁ লগতে নিৰ্বাচন সম্পৰ্কীয় যিকোনো বিষয় লৈ হেল্পলাইন নম্বৰ ১৯৫০ ত যোগাযোগ কৰিবলৈ আহ্বান জনায়।
তেওঁ কয় যে নিশা ১০ বজাৰ পৰা পুৱা ৬ বজালৈ মাইকৰ ব্যৱহাৰ নিষিদ্ধ কৰাৰ লগতে ২৫ মাৰ্চ সন্ধিয়া ৫ বজাৰ পাছত প্ৰচাৰ অভিযান বন্ধ কৰিব লাগিব।
তেওঁ আৰ্হি আচৰণ বিধি ভংগ কৰাৰ কোনো ঘটনা দৃষ্টিগোচৰ হ’লে C-Vigil এপযোগে অভিযোগ দাখিল কৰিবলৈকো আহ্বান জনায়।
বৈঠকত অতিৰিক্ত উপায়ুক্ত ৰক্তিম বৰুৱা আৰু ভালেকেইগৰাকী বিষয়া উপস্থিত আছিল।
