টিভি চেনেল বা বাতৰি কাকত খুলিলেই যুদ্ধ, হিংসা, দুৰ্নীতি, হিংসাৰ খবৰ দেখা যায়। বহুসময়ত দেখা যায় যে ভাল ঘটনাবোৰ বিশেষ গুৰুত্বসহকাৰে ছপা নহয় কিন্তু বেয়া নেতিবাচক খবৰবোৰ ভালদৰে ছপা হয়। সেইবাবেই বহুতে বাতৰি কাকত পঢ়া নাই বা টিভিত বাতৰি নাচায়। এমিলি কক্সহেডে সেই একেখিনি লোকৰ বাবে মুকলি কৰিছে ‘দ্য হেপি নিউজ’। য’ত আছে মাথোঁ ভাল খবৰ।
বাতৰি অনুসৰি, কাকত আৰু ছ’চিয়েল মিডিয়াত যুদ্ধ, হিংসা আৰু দুৰ্ঘটনা সংঘটিত হোৱাৰ খবৰ চাই চাই যুক্তৰাজ্যৰ নাগৰিক এমিলি কক্সহেড এসময়ত মানসিকভাৱে বিপৰ্যস্ত হৈ পৰিছিল। তেতিয়াই তেওঁ এখন নতুন কাকত প্ৰকাশৰ কথা ভাবিলে য’ত দুখজনক ঘটনাৰ কোনো খবৰ নাথাকিব, থাকিব মাথোঁ ইতিবাচক খবৰ।
সেই ধাৰণাটোৰ পৰাই মিজ কক্সহেডে ২০১৫ চনত ‘দ্য হেপি নিউজ’ নামৰ কাকতখনৰ বাবে ধন সংগ্ৰহ কৰিবলৈ আৰম্ভ কৰে।
কেৱল ইতিবাচক খবৰেৰে ভৰা ৩২ পৃষ্ঠাৰ এইখন এখন পূৰ্ণাংগ বাতৰি কাকত। কিন্তু ই দৈনিক, সাপ্তাহিক বা মাহেকীয়া নহয় – ই তিনিমহীয়া কাকত। কাৰণ, প্ৰতিদিনে ৩২ পৃষ্ঠাৰ বাতৰি কাকত এখন ভৰোৱাৰ বাবে ইমান ভাল খবৰ পোৱাটো সহজ নহয়। পিচে, বাতৰি কাকতবোৰ সাধাৰণতে খৰখৰীয়া আৰু ইমান ৰঙীন নহয়। কিন্তু এই কাকতখন ইয়াৰ ঠিক বিপৰীত।
২০১৫ চনত কক্সহেডে ছ’চিয়েল মিডিয়াত তেওঁৰ পৰিকল্পিত হেপি নিউজৰ ফ্ৰণ্ট পেজ কেনেকুৱা হ’ব তাৰ ডিজাইন পোষ্ট কৰি লিখিছিল, ‘কল্পনা কৰক যদি এনেকুৱা এখন কাকত বাস্তৱত থাকিলেহেঁতেন।’ তেওঁৰ পোষ্টটো পঢ়ি বহুকেইজনে তেওঁক আগবাঢ়ি যোৱাৰ বাবে অনুপ্ৰাণিত কৰে। তেতিয়াই তেওঁ এখন বাতৰি কাকত আৰম্ভ কৰাৰ সিদ্ধান্ত লয় আৰু তেওঁৰ সেই কাকতখন মানুহৰ হাতে হাতে জনপ্ৰিয় হৈ পৰে ।
কক্সহেডে কয়, “মই আৰু পাঠকসকলে কাকতখন হাতে হাতে বিয়পাই দিলোঁ। চুবুৰীয়া বা বন্ধুক দি, ৰে’ল বা বাছত দি অহাৰ জৰিয়তেই ই বহু মানুহৰ ওচৰলৈ যায়।”
কক্সহেডে কয় যে এই বছৰবোৰৰ ভিতৰত আটাইতকৈ আকৰ্ষণীয় খবৰটো আহিছিল অষ্ট্ৰেলিয়াৰ পৰা। অষ্ট্ৰেলিয়াৰ আটাইতকৈ বয়সীয়াল ব্যক্তিজনে কিছুমান আহত পেংগুইনৰ বাবে কাপোৰ বনাইছিল। ইয়াৰ ছবি আৰু কাৰ্টুন কাকতত ছপা হৈছিল। তেওঁৰ বাবে সেই খবৰটো বাতৰি কাকতখনত ছপা হোৱা আটাইতকৈ মনোগ্ৰাহী খবৰ যেন লাগে।
কক্সহেডে ভাবে যে প্ৰতিদিনে পৃথিৱীত ভয়ংকৰ কথাবোৰ ঘটি আছে। মই সেইবোৰ লুকুৱাব নিবিচাৰো। কিন্তু মই ভাবো আমিও ভাল বস্তুবোৰৰ বিষয়েও জনা উচিত।
