পাকিস্তানী সেনা ক্ৰমান্বয়ে ভাৰত সীমান্তৰ ফালে আগবাঢ়ি অহা দেখা গৈছে। অৰ্থাৎ পাকিস্তানে এতিয়া পৰিস্থিতিটোক পূৰ্ণাংগ যুদ্ধলৈ উন্নীত কৰিবলৈ চেষ্টা কৰিছে বা পূৰ্ণাংগ যুদ্ধৰ বাবে প্ৰস্তুতি চলাইছে। শনিবাৰে ভাৰতীয় বায়ুসেনাৰ উইং কমাণ্ডাৰ ভ্যোমিকা সিঙে সংবাদমেলত এই দাবী কৰি কয় যে আমি দেখিছো যে পাকিস্তানী বাহিনী ক্ৰমান্বয়ে সীমান্তৰ কাষ চাপিছে।
তেওঁ লগতে কয় যে পাকিস্তানী স্থল বাহিনীয়ে আগবাঢ়ি অহাৰ অৰ্থ হ’ল তেওঁলোকে উত্তেজনা আৰু অধিক বৃদ্ধিৰ চেষ্টা চলাইছে। এনে পৰিস্থিতিত ভাৰতীয় সশস্ত্ৰ বাহিনীয়েও চূড়ান্ত প্ৰস্তুতি চলাইছে। পাকিস্তানৰ যিকোনো পদক্ষেপৰ প্ৰতি দ্ৰুত আৰু উপযুক্ত সঁহাৰি দিবলৈ ভাৰতীয় বাহিনী সম্পূৰ্ণৰূপে সজ্জিত। ভাৰতে উত্তেজনা লাঘৱ হোৱাটো বিচাৰে, কিন্তু পাকিস্তানে সঁহাৰি দিলেহে সেইটো হ’ব বুলি কয় উইং কমাণ্ডাৰ ভ্যোমিকাই।
অপাৰেচন সিন্দুৰৰ পিছৰে পৰা পাকিস্তানে সীমান্তৰ উত্তেজনাক যুদ্ধলৈ লৈ যাবলৈ ক্ৰমান্বয়ে উচটনি দি আহিছে। শনিবাৰে পুৱা এখন সংবাদমেলযোগে বৈদেশিক মন্ত্ৰালয়ে জনায় যে পাকিস্তানৰ আচৰণৰ বাবে দুয়োখন দেশৰ মাজত সামৰিক উত্তেজনা বৃদ্ধি পাইছে। আজি বৈদেশিক সচিব বিক্ৰম মিশ্ৰীয়ে কয় যে পাকিস্তানৰ আচৰণৰ বাবে উত্তেজনা বৃদ্ধি পাইছে। ইয়াৰ প্ৰতি সঁহাৰি জনাইছে ভাৰতে।
বৈদেশিক সচিবগৰাকীয়ে লগতে কয় যে, “মই ইয়াৰ পূৰ্বে বহুবাৰ কৈছো যে পাকিস্তানে অহৰহ প্ৰৰোচনাৰে যুদ্ধ পৰিস্থিতিতউচটনি দি আছে। যাৰ প্ৰতি সঁহাৰি জনায় ভাৰতীয় সেনা আৰু বায়ুসেনাই। আজি পুৱাৰ পৰা পাকিস্তানী বাহিনীয়ে ভাৰতৰ কেইবাটাও স্থানত ড্ৰোন আৰু বিমান আক্ৰমণ চলাইছে। কিন্তু ভাৰতে তেওঁলোকৰ প্ৰত্যেককে উপযুক্ত উত্তৰ দিছে।”
সংবাদমেলত কৰ্ণেল ছোফিয়া কুৰেশ্বীয়ে কয় যে পাকিস্তানৰ বিমান আক্ৰমণৰ ফলত উধামপুৰ, ভুজ, পাঠানকোট আৰু ভাটিন্দাত থকা ভাৰতীয় বিমান ঘাটিসমূহৰ সামান্য ক্ষতিসাধন হয়। পাকিস্তানে আগ্ৰাসন অব্যাহত ৰাখিছে। ড্ৰ’ন আৰু দীৰ্ঘ দূৰত্বৰ ক্ষেপণাস্ত্ৰৰ উপৰিও গোটেই নিশাটো গোলাবৰ্ষণ অব্যাহত থাকে। ভাৰতীয় ঘাটিসমূহক লক্ষ্য কৰি পূৰ্ণাংগ যুদ্ধৰ ধৰণত জেট বিমানেৰে আক্ৰমণ চলাইছে। শুকুৰবাৰে নিশাৰ পৰা পুৱালৈকে প্ৰায় ২৬টা স্থানৰ পৰা পাকিস্তানী বিমানে ভাৰতত প্ৰৱেশ কৰিবলৈ চেষ্টা কৰিছিল। পুৱা প্ৰায় ১:৪০ বজাত পঞ্জাৱৰ এয়াৰ বেছত আক্ৰমণৰ চেষ্টা চলায়। আনকি পাকিস্তানী সেনাই যুদ্ধৰ চৰ্ত উলংঘা কৰি চিকিৎসালয় আৰু বিদ্যালয়ত আক্ৰমণৰ চেষ্টাও কৰিছিল।
সংবাদমেলত উপস্থিত থকা উইং কমাণ্ডাৰ ভ্যোমিকা সিঙে জনাইছে যে ভাৰতীয় বাহিনীয়ে পাকিস্তানী সেনাৰ ঘাটি আৰু সন্ত্ৰাসবাদী প্ৰশিক্ষণ শিবিৰত অতি বেগেৰে আৰু নিখুঁতভাৱে আক্ৰমণ চলাইছিল। ইফালে বি এছ এফে ছিয়ালকোটৰ এটা সন্ত্ৰাসবাদী ঘাটি সম্পূৰ্ণৰূপে ধ্বংস কৰিছে।
তেওঁ লগতে কয় যে ভাৰতীয় বাহিনীৰ প্রত্যুত্তৰে বখালি পেলোৱা পাকিস্তানে এতিয়াও নিজৰ কুৎসিত, ভুৱা অপপ্ৰচাৰ অব্যাহত ৰাখিছে। ভাৰতৰ চুৰাট আৰু ছিৰছাত থকা বিমান ঘাটিত থকা এছ-৪০০ ব্যৱস্থা ধ্বংস কৰা বুলি পাকিস্তানে কৰা দাবী সম্পূৰ্ণ মিছা।
