কলেজ চৌহদত সহপাঠীৰ সৈতে ক্ৰিকেট খেলি আছিল ২১ বছৰীয়া যুৱকজনে। খেলাৰ মাজতে ঘটিল অঘটন। হঠাৎ যুৱকজন মাটিত লুটি খাই পৰিল। তাৰ পিছত আৰু কোনো সঁহাৰি পোৱা নগ’ল।
কলেজৰ খেলপথাৰত ক্ৰিকেট খেলি থাকোঁতে মৰ্মান্তিক পৰিণতি ঘটিল এগৰাকী ছাত্ৰৰ। হাৰ্ট এটেকত আক্ৰান্ত হৈ সাৱটিলে মৃত্যুক।
সৰ্বভাৰতীয় সংবাদ মাধ্যমৰ সূত্ৰ অনুসৰি এই ঘটনা সংঘটিত হৈছে তেলেংগানাৰ হায়দৰাবাদত। আৰক্ষীয়ে জনোৱা মতে মৃত ছাত্ৰজনৰ নাম বিনয় কুমাৰ।
তেওঁ খাম্মাম জিলাৰ বাসিন্দা আছিল। চি এম আৰ ইঞ্জিনিয়াৰিং কলেজৰ চতুৰ্থ বৰ্ষৰ বি টেকৰ ছাত্ৰ। শুকুৰবাৰে সন্ধিয়া হায়দৰাবাদৰ মেডচাল অঞ্চলত চিএমআৰ ইঞ্জিনিয়াৰিং কলেজৰ উদ্যোগত এখন ক্ৰিকেট প্ৰতিযোগিতা অনুষ্ঠিত হয়। তাতেই ঘটনাটো সংঘটিত হৈছিল।
সেইদিনা বিনয় বন্ধুৰ সৈতে ক্ৰিকেট খেলাত ব্যস্ত আছিল। ফিল্ডিং কৰি থাকোঁতে হঠাতে মুখ উবুৰি খাই পৰে। সহপাঠীসকল খৰধৰকৈ দৌৰি ওচৰলৈ আহে। কলেজৰ অধ্যাপকসকলও খৰধৰকৈ বিনয়ক খেলপথাৰৰ পৰা উদ্ধাৰ কৰি চিকিৎসালয়লৈ লৈ যায়।
কিন্তু তাত তততাতয়াকৈ উপস্থিত হোৱাৰ পিছতো শেষৰক্ষা নহ’ল। চিকিৎসকে তেওঁক মৃত ঘোষণা কৰে। চিকিৎসকে লগতে জনায় যে হৃদযন্ত্ৰৰ ক্ৰিয়া বন্ধ হোৱাৰ ফলত তেওঁৰ মৃত্যু হৈছে।
এগৰাকী প্ৰতিভাৱান ছাত্ৰৰ আকস্মিক মৃত্যুত তেওঁৰ পৰিয়াল আৰু কলেজৰ সহপাঠীসকলৰ মাজত শোকৰ ছাঁ পৰিছে। কম বয়সতে হাৰ্ট এটেকত আক্ৰান্ত হৈ ছাত্ৰগৰাকীৰ মৃত্যুত সকলোৱে স্তম্ভিত হৈ পৰে।
