যোৱা ১৩ মে’ত বন বিভাগৰ জিম্মাৰ পৰা পলায়ন কৰা এজন দুর্ধৰ্ষ গঁড় চিকাৰীক আৰক্ষীয়ে পুনৰ আটক কৰিবলৈ সক্ষম হয়। কলিয়াবৰ মহকুমা আৰক্ষী বিষয়া মৃন্ময় দাসৰ নেতৃত্বত যোৱা এটা আৰক্ষী দলে মঙলবাৰে নিশা অভিযান চলাই আখতাৰ আলী নামৰ গঁড় চিকাৰীজনক আটক কৰে।
উল্লেখযোগ্য যে কলিয়াবৰ আৰক্ষী আৰু কাজিৰঙা ৰাষ্ট্ৰীয় উদ্যান কৰ্তৃপক্ষৰ যুটীয়া অভিযানত যোৱা ৯ মে’ত আটক হোৱা আখতাৰ আলীয়ে ১৩ মে’ত বাগৰিস্থিত কাজিৰঙা বন বিভাগৰ পশ্চিম ৰেঞ্জৰ জিম্মাৰ পৰা পলায়ন কৰিছিল। তেওঁৰ বিৰুদ্ধে ২০১৮ চনৰ ডিচেম্বৰত ভলুকাজান বন শিবিৰত গঁড় নিধনত জড়িত থকাৰ অভিযোগ আছিল।
লগতে পঢ়ক আৰক্ষীৰ জিম্মাৰ পৰা পলাল দুৰ্ধৰ্ষ গঁড় চিকাৰী আখতাৰ
২০১৬ চনত উচ্ছেদ কৰা কাজিৰঙা ৰাষ্ট্ৰীয় উদ্যানৰ বান্দৰডুবিৰ বাসিন্দা ২৭ বছৰীয়া আখতাৰ আলী শেহতীয়াকৈ জখলাবন্ধাৰ গৰুবন্ধাত বাহৰ পাতি আছিল।
কলিয়াবৰ আৰক্ষীয়ে ইতিমধ্যে জখলাবন্ধা আৰক্ষী নিৱেশত আখতাৰ আলীৰ বিৰুদ্ধে ১৬৬/১৮ আৰু ৭৫/১৮ নম্বৰৰ দুটা গোচৰ পঞ্জীয়ন কৰিছে বুলি জানিবলৈ দিয়ে। আনাহাতে গঁড় চিকাৰীজনক কৰায়ত্ত কৰাৰ ক্ষেত্ৰত আৰক্ষীয়ে দেখুওৱা তৎপৰতাক অঞ্চলটোৰ ৰাইজে শলাগ লৈছে।
