বোকাখাত মহকুমাৰ বুৰঞ্জী প্ৰসিদ্ধ এটা নদী বন্দৰৰ নাম নিকৰিঘাট। বছৰৰ বেছি ভাগ সময়তেই জাক জাক জলচৰ পক্ষীৰ কলৰৱত মুখৰিত হৈ থাকে নিকৰিঘাট আৰু ইয়াৰ সমীপৰ চাপৰিবোৰত। কিন্তু এতিয়া যেন এই পৰিভ্ৰমী চৰাইবোৰলৈ আহিছে অশনি সংকেত।
নিকৰিৰ প্ৰাকৃতিক সৌন্দৰ্য আৰু পক্ষীৰ কাকলিয়ে হাতবাউল দি মতা এই অঞ্চলটোত শেহতীয়াকৈ পৰ্যটকসকলৰ মনোৰঞ্জনৰ বাবে স্থাপন কৰা হৈছে এক অত্যাধুনিক পৰ্যটন নিৱাস। নিকৰি কেম্প নামেৰ আৰম্ভ হোৱা এই পৰ্যটন নিৱাসটোৱে অদূৰদৰ্শীতাৰে আৰম্ভ কৰা পেৰা গ্লাইডিঙৰ ব্যৱস্থাই নিকৰিঘাট অঞ্চলত উমলি জামলি থকা পৰিভ্ৰমী চৰাই জাকবোৰৰ মাজত এতিয়া ত্ৰাসৰ সৃষ্টি কৰিছে।
পেৰা গ্লাইডিঙৰ বাবে ব্যৱহাৰ কৰা পপেলাৰ আৰু মটৰৰ বিকট শব্দৰ লগতে আকাশত উৰা পেৰাচুতে এতিয়া নিকৰিঘাট এৰিবলৈ বাধ্য কৰিছে স্থানীয় প্ৰজাতিৰ লগতে দেশী বিদেশী পৰিভ্ৰমী চৰাইৰ জাকবোৰক।
উল্লেখ্য যে শীত কালত নিকৰিঘাট অঞ্চললৈ চীন দেশৰ কিংহাই প্ৰদেশ আৰু লাডাখৰ পৰা অহা ধৃতৰাজ আৰু চাকৈচকোৱা চৰাইৰ লগতে স্থানীয় পৰিভ্ৰমী শৰালি, বালিঘোঁৰা, কনুৱা, আকুহা বগ, বেজিনেজীয়া আদি বিভিন্ন প্ৰজাতিৰ চৰাই আহি অঞ্চলটো মুখৰিত কৰি তোলে। আৰু প্ৰকৃতিৰ এই বিনন্দীয়া দৃশ্য উপভোগ কৰিবলৈ অঞ্চলটোলৈ শ শ পৰ্যটকৰ আগমণ ঘটা পৰিলক্ষিত হয়।
এইখিনিতে মন কৰিবলগীয়া কথা যে নিকৰিঘাটৰ উত্তৰ দিশে থকা ভক্তে চাপৰিৰ পৰা পশ্চিমলৈ প্ৰসাৰিত হৈ থকা কাজিৰঙাৰ ষষ্ঠ সংযোজন এলেকাতো পেৰা গ্লাইডিঙৰ নেতিবাচক প্ৰভাৱ পৰাৰ সম্ভাৱনা প্ৰকট হৈ উঠিছে।
ইফালে সময় থাকোতেই বন বিভাগ তথা প্ৰশাসনে উচিত ব্যৱস্থা গ্ৰহণ নকৰিলে অঞ্চলটোৰ পৰা পৰিভ্ৰমী চৰাইবোৰ চিৰদিনৰ বাবে নাইকীয়া হৈ যাব বুলি ক্ষেদ ব্যক্ত কৰিছে স্থানীয় লোকৰ লগতে প্ৰকৃতিপ্ৰেমীয়ে।
